სამართალი

შემოვიდნენ, ეგრევე ხელების გადაგრეხვა, გადამეტებული დოზით ძალადობა, გამოგვათრიეს გარეთ გინებით- პრეზიდენტის სიძე

ნარკოტიკების შეძენა-შენახვისთვის ბრალდებული მიხეილ თათარაშვილის სასამართლო პროცესი გაიმართა.

დაკავებული ბრალდებას არ ადასტურებს და აცხადებს, რომ მისი დაკავება უკანონოდ მოხდა.
ბრალდებული ირწმუნება, რომ მან დაკავებიდან მეორე დღეს გაიგო, რომ მას დიდი ოდენობით ნარკოტიკული საშუალების შეძენა-შენახვას ედავებოდნენ.

თათარაშვილის განცხადებით, მას პოლიციას არ განუმარტავს რატომ ითხოვდნენ ავტომობილში ჩამჯდარიყო.

"როცა ვკითხე რატომ უნდა ჩავჯდე დაკავებული ვართქო? მითხრეს - არაო, უნდა გაგესაუბროთო, შემდეგ მანქანაში ჩამტენეს და გაურკვეველი მიმართულებით წამიყვანეს. 2 დღეში, წინასწარი დაკავების იზოლატორში გავიგე, რომ დაკავებული ვიყავი ნარკოტიკის შეძენა-შენახვის ბრალდებით,"- განაცხადა განსასჯელმა.

მიხეილ თათარიშვილის ინტერესების დამცველი ირმა ჭკადუა აცხადებს, რომ დაკავების შემდეგ თათარიშვილს სამედიცინო ექსპერტიზა ჩაუტარდა.

„თათარიშვილი არის შოკში, იმდენად წარმოუდგენელია მისთვის ეს ყველაფერი. სამი საათის განმავლობაში ექიმებმა კლინიკურად შეამოწმეს და განაცხადეს, რომ ის არ იმყოფებოდა კლინიკურად ნარკოლოგიური თრობის ქვეშ, ხოლო ლაბორატორიულ შემოწმებაზე ემ ვე დე-ს დაწესებულებაში უარი განაცხადა, ვგეგმავთ სამხარაულში ჩავაბაროთ თმის ღერი, რაც ყველას დაარწმუნებს, რომ ის არასოდეს მომხმარებელი არ ყოფილა,“- განაცხადა ადვოკატმა, ირმა ჭკადუამ.

სასამართლო პროცესზე იმყოფებოდა პრეზიდენტის სიძე, რომელიც აცხადებს, რომ თათარიშვილის დაკავების დროს ის მეგობართან ერთად იმყოფებოდა.

„შემოვიდნენ, ეგრევე ხელების გადაგრეხვა, გადამეტებული დოზით ძალადობა, გამოგვათრიეს გარეთ გინებით, ყვირილით, მანქანაში ჩატენვით. შიდა ქართლის სამხარეო პოლიციიდან ვართო, მერე აღმოჩნდა, რომ თურმე მოიტყუეს და ქალაქის მთავარი სამმართველოდან იყვნენ, ტელეფონი, ყველაფერი წაგვართვეს, მიშო ჩასვეს მანქანაში და მოიტაცეს. ადგილზე მე ხუთი წუთი ვყავდი დაკავებული, იმიტომ, რომ არ გავყოლილიყავი და ვერ მივმხვდარიყავი სად მიჰყავდათ მიშო, ის გააქრეს, რომ მართლა ვერ გავიგე სად წაიყვანეს, მერე გავიგე, რომ მთავარ სამმართველოში ჰყავდათ და აღმოაჩნდა 18 აბი სუბოტექსი, არც მე გავუჩხრეკივარ, არც ლევან მაისურაძე, მიშოზე იყო ეტყობა აშკარა მითითება, რომ ის უნდა დაეჭირათ,“- განაცხადა მინდია გოგოჭურმა.