კომენტარი

შემიძლია მის სიცოცხლეზე დავიფიცო, პატრიარქის გამო საკუთარ ოჯახს გადაწევს უკანა პლანზე - დეკანოზ მამალაძის დედა

ყველაფერი ტყუილია, ჩემი შვილი სიცოცხლის ფასად დაიცავდა პატრიარქს, - ასე ეხმაურება დაკავებული მამა გიორგი მამალაძის დედა, ქეთევან მაღლაკელიძე მისი შვილის მიმართ წაყენებულ ბრალს.

დაკავებული სასულიერო პირის დედა ჟურნალისტებთან საუბრისას ამბობს, რომ მამა გიორგის უდანაშაულობაში ეჭვი არ ეპარება. მისი თქმით, დეკანოზს პატრიარქი იმდენად უყვარს, რომ მისი გულისთვის შეეძლო თავისი სიცოცხლეც კი გაეწირა.

„ინფორმაციებს, რაც ვრცელდება, ვგებულობთ მედიით. რადგან ჩემი შვილი დუმილის უფლებას იყენებს, ჩვენც ვდუმდით და არაფერს ვამბობდით. როგორ შეიძლება მღვდლის დედას იმ ინფორმაციის სჯეროდეს, რაც პროკურატურამ დადო? - ეს პირველი და უმთავრესი. მეორე ის, რომ ეს ბავშვი ქუჩიდან არ მოსულა - შეგნებულად, ბავშვობიდან ეკლესიაშია და მე როგორც ოჯახის წევრმა, შემიძლია მის სიცოცხლეზე დავიფიცო, რომ პატრიარქის გამო საკუთარ ოჯახს გადაწევს უკანა პლანზე. ეს ყველაფერი სისულელეა“, - განაცხადა ქეთევან მაღლაკელიძემ.

ამასთან, დაკავებული დეკანოზის დედა აღნიშნავს, რომ მასთან სამართალდამცველები ამ დრომდე არ მისულან და შესაბამისად, არც ჩხრეკა ჩატარებულა მათ საცხოვრებელ ბინაში.

"ერთი ძალოვანის ფეხი არ შემოდგმულა ჩემს ოჯახში", - აღნიშნა მან.

ობუდსმენის მიერ გახმაურებულ ინფორმაციას, რომ მამა გიორგი მამალაძე მისი ოჯახის უსაფრთხოების გარანტიებს ითხოვს, დედისთვის ამის შესახებ არ არის ცნობილი.

ქეთევან მაღლაკელიძის თქმით, მამაო სამსახურის დეტალებზე ოჯახში არ საუბრობდა და მათ აქამდე საფრთხე არ დამუქრებიათ.

ნინო ექვთიმიშვილი