პოლიტიკა

შემაშფოთებელი იყო კონკრეტული პარტიის, პარტიების წარმომადგენლების სოლიდარობა დესტრუქციულად მოქმედ ადამიანებს - ირაკლი კობახიძე

საქართველოს პარლამენტის თავმჯდომარემ, ირაკლი კობახიძემ ბათუმში მომხდარ არეულობაზე საუბრისას იმ პოლიტიკური პარტიების პასუხისმგებლობაზე ისაუბრა, რომლებმაც სოლიდარობა გამოუცხადეს „დესტრუქციულად მოქმედ ადამიანებს“.~

კობახიძე არ გამორიცხავს სანქციების ამოქმედებას კონკრეტული პოლიტიკოსისა თუ პარტიის მიმართ.

„განსაკუთრებით შემაშფოთებელი იყო კონკრეტული პარტიის, პარტიების წარმომადგენლების დამოკიდებულება საკითხის მიმართ. მაგალითად სოლიდარობა, რომელიც მათ გამოუცხადეს დესტრუქციულად მოქმედ ადამიანებს. აქედან გამომდინარე, მთავარია, დაველოდოთ გამოძიების შედეგებს, ზუსტად ვნახოთ, როგორ წარიმართა პროცესები, ვინ იდგა ამის უკან, იყო თუ არა მართული პროცესები და ამის საფუძველზე უნდა დადგეს სამართლებრივი და პოლიტიკური პასუხისმგებლობა. მე ვფიქრობ, ძალიან მნიშვნელოვანია, დაველოდოთ გამოძიების შედეგებს და ამის საფუძველზე ვისაუბროთ კონკრეტულ სანქციებზე, რომელიც შეიძლება ამოქმედდეს კონკრეტული პოლიტიკური ძალების თუ ადამიანების მიმართ. თუ იკვეთება სამართლებრივი დანაშაულის ნიშნები, შეიძლება ვისაუბროთ სამართლებრივ დევნაზე, პოლიტიკური პასუხისმგებლობა არის სხვა და გამოძიების შედეგებიდან გამომდინარე პოლიტიკურ საკითხებზეც უნდა ვისმჯელოთ“, - განაცხადა ირაკლი კობახიძემ.

შეგახსენებთ, 11 მარტს ბათუმში „ბათუმი პლაზას“ მიმდებარე ტერიტორიაზე არასწორი პარკირების გამო მამა-შვილის დაჯარიმებასა და შემდგომში ადმინისტრაციული წესით დაკავებას პროტესტი მოჰყვა. აქციის მონაწილეები არაადეკვატურად მაღალ ჯარიმებს აპროტესტებდნენ, ასევე საპატრულო პოლიციის უფროსს ადგილობრივების მიმართ შეუმწყნარებლობაში ადანაშაულებდნენ.

ანა მებურიშვილი