პოლიტიკა

შეხედოს საჯარო რეესტრის მონაცემებს, ეთიკა კიდევ ამ ადამიანს არ მოეკითხება - ეკა გიგაურმა ვანო ზარდიაშვილს უპასუხა

„საერთაშორისო გამჭვირვალობა-საქართველოს“ აღმასრულებელმა დირექტორმა ეკა გიგაურმა პარლამენტის იურიდიულ საკითხთა კომიტეტის თავმჯდომარის მოადგილეს, ვანო ზარდიაშვილს ურჩია, შეამოწმოს საკუთარი სამეწარმეო საქმინობასთან დაკავშირებით საჯარო რეესტრის მონაცემები.

„ვურჩევდი მას, რომ შეხედოს საჯარო რეესტრის მონაცემებს, სხვა კომენტარი არ მაქვს ამასთან დაკავშირებით. ეთიკა კიდევ ამ ადამიანს არ მოეკითხება“, - განაცხადა გიგაურმა.

დეპუტატმა ვანო ზარდიაშვილმა პარლამენტის სხდომაზე გიგაური დეპუტატების სამეწარმეო საქმიანობაზე გამოქვეყნებული კვლევის გამო არაკომპეტენტურობაში დაადანაშაულა.

„ის, რასაც ეკა გიგაური პროკურორ გვარამიასთან ერთად ეწევა, მიზანმიმართული ტყუილი ან არაკომპეტენტურობაა“, -თქვა ზარდიაშვილმა.

შეგახსენებთ, გუშინ არასამთავრობო ორგანიზაციამ გამოაქვეყნა კვლევა, სადაც საჯარო რეესტრის მონაცემებზე დაყრდნობით დადგინდა, რომ 9 დეპუტატი სამეწარმეო საქმიანობას ეწევიან. მათ შორის არიან: ედიშერ თოლორაია („ქართული ოცნება“), დიმიტრი სამხარაძე („ქართული ოცნება“), იოსებ მაკრახიძე („ქართული ოცნება“), მამუკა მდინარაძე („ქართული ოცნება“), მარიამ ჯაში („ქართული ოცნება“), დავით ჭიჭინაძე („ქართული ოცნება“), დიმიტრი ხუნდაძე („ქართული ოცნება“), მამუკა ჩიქოვანი („ევროპული საქართველო- რეგიონები“),გიორგი ლომია (საქართველოს პატრიოტები).

„საერთაშორისო გამჭვირვალობა-საქართველოს“ განმარტებით, კანონმდებლობა ამას კრძალავს, ხოლო დარღვევის აღმოჩენის შემთხვევაში დეპუტატს ვადამდე ადრე პარლამენტის წევრობის უფლებამოსილება უწყდება.

ანა მებურიშვილი