პოლიტიკა

შეიძლება, ივანიშვილმაც, წულუკიანმაც და ყველა მათმა სატელიტმა დაგაბრალოს დანაშაული, მერე პროცესზეც დაამტკიცო, რომ დანაშაული არ ჩაგიდენია და პროცესი მაინც წაგაგებინონ - ეკა გიგაური

არასამთავრობო ორგანიზაცია „საერთაშორისო გამჭვირვალობა-საქართველოს“ ხელმძღვანელის, ეკა გიგაურის განცხადებით, საქალაქო სასამართლოს გადაწყვეტილების მიუხედავად, ის ბრძოლას გააგრძელებს. ასე გამოეხმაურა გიგაური სოციალურ ქსელში თბილისის საქალაქო სასამართლოს გადაწყვეტილებას, რომელმაც არ დააკმაყოფილა მისი სარჩელი გოგა ხაინდრავას წინააღმდეგ.

გიგაურმა არ გამორიცხა, რომ საჭიროების შემთხვევაში სტრასბურგის სასამართლოს მიმართოს.

მისივე განმარტებით, სასამართლომ დაადგინა, რომ სინამდვილეში „ივანიშვილმაც, წულუკიანმაც და ყველა მათმა სატელიტმა შეიძლება საჯაროდ, ყოველგვარი დასაბუთების და საფუძვლის გარეშე დანაშაული დაგაბრალოს“, სასამართლო პროცესზე დაამტკიცო, რომ დანაშაული არ ჩაგიდენია, მაგრამ მაინც წაგაგებინონ.

„დღეს ივანიშვილის სატელიტების წინააღმდეგ სასამართლო წავაგე. მიუხედავად იმისა, რომ მე ვიჩივლე ცილისწამებისთვის, ზუსტად ვიცოდი, რომ ჩემ წინააღმდეგ დაგეშილ სახელმწიფო ინსტიტუტებს ვებრძოდი და ასეთ პირობებში მურუსიძის სასამართლოს იმედი არ უნდა მქონოდა, სასამართლოში მაინც წავედი, რადგან ჩემთვის ერთადერთი მისაღები გზა სამართლებრივი ბრძოლაა.

რეალურად კი რა მოხდა - სასამართლომ დაადგინა, რომ სინამდვილეში ივანიშვილმაც, წულუკიანმაც და ყველა მათმა სატელიტმა შეიძლება საჯაროდ, ყოველგვარი დასაბუთებისა და საფუძვლის გარეშე დაგაბრალოს დანაშაული და სასამართლომ თქვას, რომ ეს მათი აზრია. მერე მიხვიდე პროცესზე, დაამტკიცო, რომ დანაშაული არ ჩაგიდენია და პროცესი მაინც წაგაგებინონ. მიუხედავად იმისა, რომ ყველა ეს ადამიანი მიზანმიმართულად ცდილობს ჩემს დისკრედიტაციას და მტკიცებით ფორმაში მაბრალებს იმას, რასთან შეხებაც არასდროს არ მქონია, ჩვენი სასამართლოს აზრით, მათ პასუხი არ შეიძლება მოეთხოვოთ. უნდა ითქვას ისიც, რომ მსგავსი საქმეები ჩვენს სასამართლოს ჰქონია და იქ რატომღაც მოსამართლემ სწორი გადაწყვეტილება მიიღო. აქ პრობლემა ეკა გიგაურია - ეს არის ფაქტი და მიუხედავად იმისა, რომ ცილისმწამებლების მოწმეებიც კი ჩემ სასარგებლო ჩვენებებს აძლევდნენ, ჩემმა ფაქტორმა აიძულა მოსამართლე, სასამართლოს რეპუტაცია გაეწირა. მე გავაგრძელებ ბრძოლას, თუ საჭირო გახდა სტრასბურგშიც!

არავინ არ იფიქროს, რომ ჩემ წინააღმდეგ სახელმწიფოს მიზანმიმართული კამპანიის გამო პირში წყალს ჩავიგუბებ და გავჩერდები. მადლობა ქართულ სასამართლოს, ყველაზე „მიუკერძოებელსა“ და „სამართლიანს“ მსოფლიოში!“, - დაწერა გიგაურმა ფეისბუკის საკუთარ გვერდზე.

ცნობისთვის, თბილისის საქალაქო სასამართლომ არ დააკმაყოფილა ეკა გიგაურის სარჩელი რეჟისორ გოგა ხაინდრავასა და გურამ ადამაშვილის წინააღმდეგ.

მოსამართლე ქეთევან კუჭავას განმარტებით, გოგა ხაინდრავას სადავო განცხადებაში არ იყო ცილისმწამებლური ელემენტები და იყო მხოლოდ შეფასება.

საქმე ეხება 2014-2015 წლებში ხაინდრავასა და ადამაშვილის მიერ სატელევიზიო ეთერით გაკეთებულ განცხადებებს, რომლებშიც მათ გიგაურს 2007 წლის 7 ნოემბრის აქციის დარბევაში დაადანაშაულეს. ხაინდრავას მტკიცებით, ოპოზიციის დასაშლელად ხელისუფლებამ ეკა გიგაურის ბრძანებით სასაზღვრო პოლიციის თანამშრომლებიც გამოიყენა, რის შემდეგ ეკა გიგაურმა კაპიტნის წოდება მიიღო. სწორედ ამის გამო გიგაურმა ხაინდრავასგან ბოდიშის მოხდა და სიმბოლურად 30თეთრის გადახდა მოითხოვა