პოლიტიკა

შეიძლება განვიხილოთ საკონსტიტუციო კომისიის დატოვების საკითხი, თუ ჩვენი მოთხოვნა არ დაკმაყოფილდა-გიორგი ტუღუში

„ევროპული საქართველოს“ წევრის, გიორგი ტუღუშის განცხადებით, პარტიის წევრებს საკონსტიტუციო ცვლილებებზე მომუშავე სახელმწიფო კომისიის დატოვების შესაძებ კონსულტაციები პრეზიდენტთან არ ჰქონია.

ამასთან, როგორც ტუღუშმა მედიასთან საუბარში აღნიშნა, იმ შემთხვევაში, თუ არ დაკმაყოფილდა პარტიის მოთხოვნები საარჩევნო სისტემის შეცვლასთან დაკავშირებით, არ არის გამორიცხული რომ „ევროპულმა საქართველომ“ კომისია დატოვოს.

„პრეზიდენტთან „ევროპულ საქართველოს“ კონსულტაციები არ ჰქონია. მე ვგულისხმობ საკონსტიტუციო კომისიის დატოვების შესაძლებლობას. „ევროპულმა საქართველომ“ თავიდანვე განაცხადა, რომ ძირითადი მიზეზი, ამ კომისიის მუშაობაში მონაწილეობის მიღების იყო, რომ მიგვეღწია საარჩევნო სისტემის ცვლილებისთვის. თუ არ დაკმაყოფილდება ჩვენი მოთხოვნები საარჩევნო სისტემასთან მიმართებაში, შეიძლება ჩვენც განვიხილოთ კომისიის დატოვება. მაგრამ, ამ ეტაპზე, ჩვენ ვმუშაობთ იმაზე, რომ მივაღწიოთ ისეთ საარჩევნო სისტემას, რომელზეც ჩვენ ვსაუბრობდით იმ დღიდან, როდესაც ამ კომისიის მუშაობაში დავიწყეთ მონაწილეობის მიღება“,-აღნიშნა ტუღუშმა.

საქართველოს პარლამენტის თავმჯდომარემ ირაკლი კობახიძე, საკონსტიტუციო ცვლილებებზე მომუშავე კომისიის დღევანდელ სხდომაზე განაცხადა, რომ პრეზიდენტი გიორგი მარგველაშვილი, ცალკეულ პარტიებსა და არასამთავრობო ორგანიზაციებთან კონსულტაციებს მართავდა კომისიის დატოვებასთან დაკავშირებით.

მონიკა დავლიანიძე