პოლიტიკა

შავი ზღვის უსაფრთხოებასთან დაკავშირებით საქართველოსთან კონსულტაციებს ვმართავთ, წინადადებებიც მივიღეთ - ჯეიმს აპატურაი

ნატო-ს გენერალური მდივნის სპეციალური წარმომადგენლის სამხრეთ კავკასიასა და ცენტრალურ აზიაში ჯეიმს აპატურაის განცხადებით, ნატო-ს სურს საქრათველოში რეფორმების განგრძობითობა იხილოს.

ამის შესახებ აპატურაიმ საზოგადოებრივ მაუწყებლისთვის მიცემულ ინტერვიუში განაცხადა.

„ნატოს სურს იხილოს საქართველოში რეფორმების განგრძობითობა. ცერემონიები და წითელი ლენტების გაჭრა კარგია, ხალხს აქვს შესაძლებლობა თანამშრომლობის შედეგი იხილოს. ჩვენთვის მნიშნელოვანია უკვე იმპლემენტაცია, ნატოს პერსონალი, მათი მუშაობა, გეგმის შედგენა, ერთობლივი წვრთნები. ჩვენ ვიმუშავებთ და უკვე ვმუშაობთ ახალ თავდაცვის მინისტრთან. გვაქვს ძალიან ბევრი საქმე. უელსის სამიტზე მიღებული არსებითი პაკეტის იმპლემენტაცია ძალიან კარგად მიმდინარეობს. ვემზადებით ახალი ერთობლივი წვრთნისთვის“,-აღნიშნა ნატო-ს გენმდივნის სპეციალურმა წარმომადგენელმა.

მისი თქმით, შავი ზღვის უსაფრთხოებაზე საუბარი საქართველოს გარეშე არ ჩაივლის.

„რაც შეეხება შავი ზღვის უსაფრთხოებას, ჩვენ გვაქვს კონსულტაციები, წინადადებები მივიღეთ უკვე საქართველოდან. შავი ზღვის უსართხოებაზე საუბარი საქართველოს გარეშე არ ჩაივლის. პირიქით, მაქსიმალურად იქნება ჩართული. ვაკეთებთ შეფასებას და ვათანხმებთ ფორმატებს“,-განაცხადა აპატურაიმ.

მონიკა დავლიანიძე