სამართალი

„შავი ზღვის უნივერსიტეტის“ ქონებაზე დაკისრებული ყადაღა მოხსნილია

შემოსავლების სამსახურმა „შავი ზღვის უნივერსიტეტის“ წინააღმდეგ სარჩელი სასამართლოდან გაიტანა, რაც გულისხმობს, რომ მოხსნილია საგანმანათლებლო დაწესებულების ქონებაზე დაკისრებული ყადაღა.

საქალაქო სასამართლოში პროცესის დასრულების შემდეგ შემოსავლების სამსახურის წარმომადგენელმა განმარტა, რომ დღეის მდგომარებით დავის გაგარძელების კანონიერი ინტერესი არ არსებობს.

„შესაბამისად, მივიღეთ გადაწყვეტილება სარჩელის გამოხმობის შესახებ, თუმცაღა, რა თქმა უნდა, ეს არ გულისხმობს სამოქალაქო საპროცესო კოდექსის თანახმად, სარჩელზე უარის თქმას“, - განაცხადა შემოსავლების სამსახურის წარმომადგენელმა.

გადაწყვეტილება შემოსავლების სამსახურმა მას შემდეგ მიიღო, რაც უნივერსიტეტმა დავალიანება, 735 000 ლარი გადაიხადა და ამის დამადასტურებელი დოკუმენტაციაც წარადგინა. IBSU-ის ადმინისტრაციამ ეს თანხა 27 აგვისტოს გადაიხადა.