პოლიტიკა

შარდის კონტეინერები მთავრობის ადმინისტრაციასთან - მოქალაქეთა ნაწილი მარნეულის ინციდენტს გამოეხმაურა

მარნეულში მოქალაქის მიმართ ჯგუფურად განხორციელებული არაადამიანური და დამამცირებელი მოპყრობის ფაქტს მოქალაქეთა ნაწილი საპროტესტო აქციით გამოეხმაურა. ახალგაზრდებმა და არასამთავრობო ორგანიზაციის წარმომადგენლებმა მთავრობის ადმინისტრაციასთან შარდის ასაღებად განკუთვნილი სამედიცინო კონტეინერები მიიტანეს.

ცნობისთვის, 11 ივნისს ფეისბუკის სხვადასხვა ჯგუფში ვრცელდებოდა ვიდეო, სადაც მამაკაცს ბოდიშს ახდევინებენ, შარდით სახის დაბანას აიძულებენ და აზერბაიჯანულად ეუბნებიან, რომ „შენ ღირსება არ გაქვს“. აღნიშნულ ვიდეოზე „მარნეულის სათემო რადიომ“ და სტუდია მონიტორმა სიუჟეტები მოამზადეს, რომლებიდანაც ირკვევა, რომ მარნეულის მკვიდრი ზაზა სარალიძის მხარდამჭერ აქციაზე „ქართული ოცნების“ თავმჯდომარის, ბიძინა ივანიშვილისა და მარნეულის მერის, თემურ აბაზოვის საჯარო შეგინების გამო დასაჯეს. „მარნეულის სათემო რადიოს“ ინფორმაციით, ვიდეოს გადაღების პროცესს ესწრებოდა მარნეულის მერი თემურ აბაზოვი.

აღნიშნულ ფაქტზე პროკურატურამ გამოძიება დაიწყო სისხლის სამართლის კოდექსის 144 (3)-ე მუხლით. დაკავებულია მარნეულის მერი.