პოლიტიკა

შალელაშვილის შესახებ მხოლოდ ის მსმენია, რომ ხელფასს იღებს და სამსახურში არ დადის - თეა წულუკიანი უმრავლესობის დეპუტატის კრიტიკას პასუხობს

„კარგია, თუ ჩემმა განცხადებამ მას მუშაობა დააწყებინა“, - ასე გამოეხმაურა თეა წულუკიანი საპარლამენტო უმრავლესობის წევრ შოთა შალელაშვილის კრიტიკას, რომელმაც უპასუხისმგებლო უწოდა იუსტიციის მინისტრის განცხადებას სახალხო დამცველის შესახებ.

წულუკიანის თქმით, ის მზადაა საჯარო დებატებში შეხვდეს უჩა ნანუაშვილს მისი, როგორც სახალხო დამცველის უფლებამოსილების გასვლის შემდეგ.

„დეპუტატი შალელაშვილის შესახებ ბევრი არაფერი მსმენია, მას არ ვიცნობ. მსმენია მხოლოდ ის, რასაც მედია ავრცელებდა, რომ რეალურად ეს არის პარლამენტში ერთადერთი დეპუტატი, რომელიც ხელფასს იღებს და სამსახურში არ დადის.

კარგია, თუ ჩემმა განცხადებამ ის სამსახურში მიიყვანა და მუშაობა დააწყებინა. ახლა მნიშვნელოვანია, რომ ჩვენ ავირჩიოთ. ყველა დეპუტატს მართლაც მისგან განსხვავებით, რომლებიც დღე და ღამე შრომობენ, ვუსურვებ ნაყოფიერ სამუშაოს იმისთვის, რომ საქართველოს მომავალი ომბუდსმენი იყოს პასუხისმგებლიანი და მართლაც ამ პატივსაცემ საკონსტიტუციო ინსტიტუტს ვეღარავინ აკადროს ზედაპირულობა, ტყუილი და მიკერძოება.

რაც შეეხება ბატონ უჩას საქმიანობას, მე მისი შეფასება გუშინდელი ჩემი 17-წლიანი პროფესიული დაკვირვების შედეგის საჯაროდ განცხადებით არ დამისრულებია, ამ საქმიანობას კიდევ შევაფასებ, მანამ ის არის ომბუდსმენი და მერეც, როცა აღარ იქნება ომბუდსმენი, და თუ მისი სურვილი იქნება, როდესაც ის შეწყვეტს ომბუდსმენობას, მზად ვარ, მასთან გავმართო საჯარო პოლიტიკური დებატი“, – თქვა წულუკიანმა.

ანა მებურიშვილი