პოლიტიკა

სევდია უგრეხელიძე საკრებულოში დამოუკიდებელი დეპუტატის სტატუსით გააგრძელებს საქმიანობას

“ნაციონალური მოძრაობის“ ყოფილი წევრი სევდია უგრეხელიძე არ უერთდება ბოკერია-უგულავას ფრთას და საკრებულოში დამოუკიდებელი დეპუტატის სტატუსით განაგრძობს საქმიანობას.

საკუთარი გადაწყვეტილების შესახებ განცხადება მან თბილისის საკრებულოში გამართულ ბრიფინგზე გააკეთა.

,,ჩემთვის სრულიად გაუგებარია ოპოზიციური პოლიტიკური ძალის დანაწევრება ტაქტიკური განსხვავებების ან პიროვნული შეუთავსებლობის გამო, ვინაიდან, ერთი რომელიმე მხარის არჩევა ამ პირობებში ნიშნავს მეორესადმი დაპირისპირებას, რისთვისაც მე არავითარი საფუძველი არ გამაჩნია. ამიტომ არ ვერთიანდები არცერთ ფრაქციაში და ვრჩები საკრებულოს დამოუკიდებელ დეპუტატად,’’ - განაცხადა სევდია უგრეხელიძემ.

შეგახსენებთ, რომ დღეს ცალ-ცალკე ფრაქციების შექმნის განცხადებით, “ერთიანი ნაციონალური მოძრაობის“ წარმომადგენლები და მათი ყოფილი თანაგუნდელები საკრებულოს თავმჯდომარეს მიმართავენ.

ცნობილია, რომ შეიქმნება ორი ფრაქცია, “ერთიანი ნაციონალური მოძრაობა“, რომელსაც ირაკლი ნადირაძე უხელმძღვანელებს და “თბილისი“ მამუკა ახვლედიანის მეთაურობით.

ანა მებურიშვილი.