პოლიტიკა

სერგო რატიანი-საჯარო სკოლაში გადაღებულ ფოტოზე: „ზოგადი განათლების შესახებ“ კანონი დაირღვა

„ევროპული საქართველოს“ წევრი სერგო რატიანი შუახევის საჯარო სკოლაში გადაღებულ ფოტოს გამოეხმაურა.

როგორც რატიანმა სპეციალურ ბრიფინგზე განაცხადა, ფოტო რომელზეც მოსწავლეებს „ქართული ოცნების“ დროშები უჭირავთ „შემაშფოთებელია“.

მისი თქმით, აღნიშნული ქმედებით, „ზოგადი განათლების შესახებ“ კანონი დაირღვა.

„ჩვენს ქვეყანაში ერთმნიშვნელოვნადაა ხაზგასმული საგანმანათლებლო სისტემის ნეიტრალურობა და მკაცრად განსაზღვრულია, რომ დაუშვებელია ზოგადსაგანმანათლებლო დაწესებულებაში სასწავლო პროცესის პოლიტიზება.

ბოლო ხუთი წლის განმავლობაში, მათ შორის, 2016 წლის საპარლამენტო არჩევნების დროს, არაერთხელ დაფიქსირდა პოლიტიკურ სიტუაციებში არასრულწლოვანთა ჩართვა და, ასევე, სკოლების რესურსის გამოყენება წინასაარჩევნო აგიტაციის პროცესში. მიუხედავად ოპოზიციის კატეგორიული მოთხოვნისა, ფაქტი არასოდეს ყოფილა დასჯილი.

სწორედ დაუსჯელობა მიანიშნებს იმაზე, რომ ასეთი ქმედებები უნებლიე გადაცდომებს ან პირად ინიციატივებს კი არ მიეკუთვნება, არამედ მმართველი პარტიის მიერ სისტემურად დაგეგმილი და წახალისებულია.

აქვე, მინდა მოგაწოდოთ ინფორმაცია იმის შესახებ, რომ რამდენიმე დღის წინ, მმართველი პარტიის მიერ ზუგდიდის მერობის კანდიდატის წარდგენისას, სკოლებს პირდაპირ ჰქონდათ დავალებული ღონისძიებაზე მიეყვანათ 20 უფროსკლასელი, რაც, რა თქმა უნდა, შესრულდა, წინააღმდეგ შემთხვევაში, წარსულის გამოცდილებიდან გამომდინარე, დაისჯებოდნენ საგანმანათლებლო სფეროს მმართველები.

მივმართავ პრემიერსა და განათლების მინისტრს, დაინტერესდნენ აღნიშნული ფაქტებით, დაიცვან კანონის უზენაესობა და უზრუნველყონ სკოლების დისტანცირება პოლიტიკური აქტივობებისაგან“,-განაცხადა სერგო რატიანმა.

მონიკა დავლიანიძე