პოლიტიკა

სერგი კაპანაძე-იური ლუჟკოვის ვიზიტზე: ხელისუფლებამ ქვეყნის ინტერესების დაცვას უფრო პასუხისმგებლობით უნდა მიუდგეს

„ევროპული საქართველოს“ წევრი სერგი კაპანაძე, საქართველოში მოსკოვის ყოფილი მერის იური ლუჟკოვის ვიზიტს გამოეხმაურა.

როგორც კაპანაძემ მედიასთან საუბარში აღნიშნა, საქართველოს ხელისუფლებამ ქვეყნის ინტერესების დაცვას უფრო პასუხისმგებლობით უნდა მიუდგეს.

„საქართველოს ხელისუფლება უფრო პასუხისმგებლობით უნდა მიუდგეს ზოგადად ქვეყნის ინტერესებისა და სუვერენიტეტის დაცვას. ლუჟკოვი არის იმ ადამიანებს შორის, რომელიც იდგა ავანგარდში ცხინვალის და აფხაზეთის რეგიონის აღიარები,. რომელიც ბევრჯერ არის ნამყოფი აფხაზეთის ტერიტორიაზე ჩვენი კანონმდებლობის დარღვევით. აქედან გამომდინარე, მისი საქართველოში უპრობლემოდ შემოსვლა, არ არის საქართველოს ეროვნულ ინტერესებში. ეს არის ის პრობლემა, რომელსაც სერიოზული ყურადღება უნდა მიექცეს“,-აღნიშნა კაპანაძემ.

მოსკოვის ყოფილი მერი იური ლუჟკოვი მეოთხე დღეა საქართველოში მეუღლესთან და მეგობრებთან ერთად იმყოფება.

როგორც ლუჟკოვმა მედიასთან საუბარში განაცხადა, მან სასაზღვრო კონტროლი უპრობლემოდ გაიარა. მისი თქმით, მესაზღვრეებმა მისი საბუთები წესის მიხედვით შეამოწმეს.

ცნობისთვის, იური ლუჟკოვს „საქართველოს კანონი ოკუპირებული ტერიტორიების შესახებ“ არაერთხელ აქვს დარღვეული. მას ოკუპირებულ აფხაზეთში ვიზიტები რამდენჯერმე აქვს განხორციელებული.

მონიკა დავლიანიძე