პოლიტიკა

საზოგადოების ეს გზავნილი მიღებული და გააზრებულია - მამუკა ბახტაძე არჩევნების შედეგებზე

პრემიერ-მინისტრის, მამუკა ბახტაძის განცხადებით, არჩევნების შედეგებით მმართველმა გუნდმა მიიღო მკაფიო გზავნილი საზოგადოებისგან, თუ რა კონკრეტული მოლოდინები აქვს იმ კონკრეტულ გამოწვევებთან დაკავშირებით, რაც მოსახლეობას აწუხებს. ამის შესახებ პრემიერმა მთავრობის ადმინისტრაციაში გამართულ ბრიფინგზე ისაუბრა.

მისივე განმარტებით, „ამ არჩევნებმა ბევრი რამ დაგვანახა, რომ ამავე დროს ქვეყანაში ბევრი რამ შესაცვლელია უმოკლეს დროში“.

„საზოგადოების ეს გზავნილი მიღებული და გააზრებულია. შესაბამისად, მეორე ტურში უზრუნველვყოფთ ერთსულოვნებას, მათ შორის, ჩვენი იმ მხარდამჭერებისას, რომლებმაც სხვადასხვა მიზეზების გამო არ მიიღეს მონაწილეობა გუშინდელ არჩევნებში. მეორე ტურში, ყველა ჩვენ ერთად აღვნიშნავთ იმ ღირებულებებისა და ფასეულობის გამარჯვებას, რისთვისაც ჩვენ ყველანი ერთად ვიბრძოდით.

ჩვენი სამშობლოს ხვალინდელ დღეს განსაზღვრავს მხოლოდ ქართველი ერი და ეს არჩევანი აუცილებლად იქნება საწინდარი ჩვენი ქვეყნის გამთლიანების, აღმშენებლობის, საზოგადოების კონსოლიდაციის, შეუქცევადი დემოკრატიული განვითარების, ისეთის, როგორიც ეკადრება ჩვენს ტრადიციებს, ისტორიას და მომავალს“, - განაცხადა ბახტაძემ.