საზოგადოება

საზოგადოებაში უკიდურესი პოლიტიკური პოლარიზაციის ფონზე, ადგილი აქვს საზოგადოებრივი მაუწყებლის ჟურნალისტებზე, მის დამოუკიდებელ სარედაქციო პოლიტიკაზე ორკესტრირებულ თავდასხმას - საქართველოს პირველი არხი

ბოლო პერიოდში საზოგადოებაში უკიდურესი პოლიტიკური პოლარიზაციის ფონზე, ადგილი აქვს საზოგადოებრივი მაუწყებლის ჟურნალისტებზე, მის დამოუკიდებელ სარედაქციო პოლიტიკაზე ორკესტრირებულ თავდასხმას, - ამის შესახებ ნათქვამია საქართველოს პირველი არხის მიერ გავრცელებულ განცხადებაში.

„გვინდა, მკაფიოდ განვაცხადოთ, რომ საზოგადოებრივი მაუწყებლის დღევანდელი თავისუფალი და ნეიტრალური სარედაქციო პოლიტიკა არის თითოეული ჩვენგანის, საზოგადოების თითოეული წევრის უდიდესი მონაპოვარი ქვეყნის დემოკრატიზაციის გზაზე.

საზოგადოებრივი მაუწყებელი ქვეყნის მთავარი ევროპული ინსტიტუციაა, მისი დამოუკიდებლობა გარანტირებულია საქართველოს კონსტიტუციით. საზოგადოებრივი მაუწყებლის დაფინანსება არის ევროპული პრაქტიკის ანალოგი, რომელზეც აპელირება იაფი პოლიტიკური ხერხია და არაფერი აქვს საერთო ორგანიზაციის სარედაქციო პოლიტიკასთან და დამოუკიდებლობასთან.

დაფინანსების არსებული ფორმა იძლევა მყარ გარანტიას, რომ ორგანიზაცია იყოს დამოუკიდებელი მთავრობისგან თუ ოპოზიციისგან“, - აღნიშნულია განცხადებაში.

„კარგად გვესმის, რომ ბოლო პერიოდში მოპოვებული და არაერთი საერთაშორისო კვლევით გამყარებული ნეიტრალური სტატუსი ორგანიზაციის მიმართ ინტერესს ზრდის და ამძაფრებს პოლიტიკოსების სურვილს, დაიქვემდებარონ თავიანთი კონტროლის ქვეშ, ამიტომ კიდევ ერთხელ განვმარტავთ: პირველი არხი ყოველთვის იქნება არა პოლიტიკური ელიტის, არამედ საზოგადოების სამსახურში, ის აღარასოდეს გახდება არცერთი პოლიტიკური ძალისთვის მხარე, რადგან დაგროვებული გამოცდილება აქ დასაქმებულ ადამიანებს არ მისცემს იმავე შეცდომის დაშვების უფლებას“, – განაცხადა საქართველოს პირველი არხის გენერალურმა დირექტორმა, თინათინ ბერძენიშვილმა.