პოლიტიკა

საზოგადოებას აქვს შეკითხვა, რომ შსს-ში, პროკურატურაში ხომ არაა ისეთი კადრი, ვისზეც არსებობს კონკრეტული ეჭვები მათი წარსულის გამო - ზაზა ხუციშვილი გიორგი გახარიას

საპარლამენტო უმრავლესობის წევრმა ზაზა ხუციშვილმა კითხვით მიმართა შს მინისტრ გიორგი გახარიას, არსებობს თუ არა მოკვლევა უწყებაში დასაქმებული თანამშრომლების წარსულის შესახებ.

„მე არ მეგულება მძიმე და უმიმესი დანაშაულებები, რომლებიც ნაციონალური მოძრაობის მმართველობის დროს არ ჩაედინოთ მაღალჩინოსნებს. ესაა რესტორნიდან კაცის გატაცება და წამებაში სულის ამოხდა, ესაა პოლიციის სამმართველოს უფროსის მიერ აივანზე გამოტანილი ტირის თოფი და 80 წლის კაცის თვალში სროლა და შემდეგ წყლის გადმოსხმა. ნუ, ორი გვამის ვიდეო ხომ საერთოდ, მსოფლიოში პრეცედენტი არაა, როცა მინისტრი უკვეთავს ორ გვამს და ამაში ფულად ჯილდოს პირდება. 7 ნოემბერი, 26 მაისი ეს იყო სასტიკი ანგარიშსწორება საკუთარი ხალხის მიმართ, დეპუტატების ცემა, ბანკის კუთვნილი ფულის გატაცება, იმედის დარბევა და ა.შ..

საზოგადოებას აქვს შეკითხვა, რომ შსს-ში, პროკურატურაში ხომ არაა ისეთი კადრი, ვისზეც არსებობს კონკრეტული ეჭვები და თუ არსებობს ასეთი მოკვლევები. მე, რა თქმა უნდა, კატეგორიული წინააღმდეგი ვარ, რომ პოლიტიკური ხელისუფლების ცვლილების დროს დარგის სპეციალისტებსა და პროფესიონალებს ეს შეეხოთ. ეს ერთხელ და სამუდამოდ უნდა ჩაბარდეს ისტორიას, მაგრამ მაინტერესებს, არის თუ არა რამე ეჭვი ან მოკვლევა დეს უწყებაში დასაქმებულ ხალხზე“, - იკითხა ხუციშვილმა