პოლიტიკა

საზოგადოებამ დააფიქსირა, რომ ქვეყნის მეთაური ხალხმა უნდა აირჩიოს - გიორგი მარგველაშვილი IRI-ის გამოკითხვაზე

საქართველოს პრეზიდენტი გიორგი მარგველაშვილი გამოეხმაურა საერთაშორისო რესპუბლიკური ინსტიტუტის (IRI-ის) სოციოლოგიური გამოკითხვას, რომლის მიხედვით, ის ყველაზე პოპულარული პოლიტიკოსია.

მარგველაშვილის განცხადებით, პრეზიდენტისა და ზოგადად პრეზიდენტის ინსტიტუტისადმი ხალხის ასეთი მაღალი ნდობა ადასტურებს, რომ პრეზიდენტი საზოგადოებამ უნდა აირჩიოს.

„ჩვენ ყოველთვის ყურადღებით ვაკვირდებით ხოლმე რეიტინგებს და ვაკვირდებით იმ დინამიკას, რაც ჩანს რეიტინგებში. რა თქმა უნდა, გვაინტერესებს ის პოზიცია, რომელსაც გამოხატავს და აფიქსირებს ქართული საზოგადოება. ჩემთვის განსაკუთრებით საინტერესო ამ რეიტინგებში იყო ის პოზიცია, რომელიც დაფიქსირდა პრეზიდენტის ინსტიტუტის საერთო, სახალხო არჩევასთან დაკავშირებით. მე მიხარია, რომ ქართულმა საზოგადოებამ, ასე ერთმნიშვნელოვნად, ასე მკაფიოდ თავისი პოზიცია დაუფიქსირა მთელს სახელმწიფოს. დააფიქსირა ძალიან ნათელი გზავნილი, რომ ხალხის ინტერესშია იმ უფლების შენარჩუნება, რაც ქართველ ხალხს ჰქონდა ტრადიციულად და რაც გულისხმობს იმას, რომ აირჩიოს ქვეყნის მეთაური. ასეთი პოზიცია და ასეთი ნათელი გზავნილი, ბუნებრივია უნდა იქნას გაზიარებული“, - განაცხადა გიორგი მარგველაშვილმა.

შეგახსენებთ, რომ IRI-ის რეიტინგი ოფიციალურ პრეზენტაციამდე რამდენიმე დღით ადრე გახდა ცნობილი. საზოგადოებრივი მაუწყებლის ინფორმაციით, წინასწარ ცნობილი შედეგების თანახმად, კითხვაზე „ხვალ რომ არჩევნები იყოს, რომელ პარტიას დაუჭერდით მხარს“, გამოკითხულთა 30% ხმას მისცემდა ფრაქცია „ქართულ ოცნებას“, 15 % - „ერთიან ნაციონალურ მოძრაობას“, ხოლო 8%- „ევროპულ საქართველოს“.

კვლევის გამოქვეყნებული ნაწილის მიხედვით, ყველაზე პოპულარული პოლიტიკოსი საქართველოს პრეზიდენტი გიორგი მარგველაშვილია 67%-იანი რეიტინგით. მას მიჰყვება ჯანდაცვის მინისტრი დავით სერგეენკო 65%-ით. მესამე ადგილზეა პრემიერ-მინისტრი გიორგი კვირიკაშვილი 55%-ით. ოთხეულს ხურავს „ევროპული საქართველოს“ წევრი დავით ბაქრაძე 50%-ით.

IRI-ის გამოკითხვის შედეგების პრეზენტაცია ორშაბათისთვისაა დანიშნული.

ანა მებურიშვილი