პოლიტიკა

საზოგადოება იზრდება და პოლიტიკოსებსაც ადეკვატური ქმედებები მოეთხოვებათ - ზურაბ ქარადგიძე

თბილისის საკრებულოს წევრის ზურაბ ქადაგიძის განცხადებით, დავით ნარმანიას ძმის შესახებ გავრცელებული ინფორმაცია, თითქოს ის დედაქალაქის ცენტრში უკონტროლო მშენებლობებს ლობირებს, იყო აფიორა, რითაც საზოგადოებაში ტემპერატურის აწევა უნდოდათ.

როგორც ქადაგიძემ პრესკონფერენციაზე აღნიშნა, რაც უფრო მცირდება არჩევნებამდე დრო, მით უფრო ეხსნებათ ადამიანებს მადა, მეტი პოლიტიკური ქულა დაიწერონ.

„რაოდენ სამწუხაროც არ უნდა იყოს, ვხედავთ, რომ ადამიანები აღარ ერიდებიან ისეთ ღია ტყუილებსაც, როგორიც იყო თუნდაც დავით ნარმანიას ძმის თემა, სადაც, ჩემდა გასაოცრად, რუსთავი 2-მა ბოდიშები იხადა.

ეს იყო აფიორა, რომლითაც უნდოდათ, რომ საზოგადოებაში ტემპერატურა აეწიათ და ადამიანებს ჰქონოდათ განცდა, რომ თურმე დავით ნარმანია და მთელი მისი ოჯახი ჩართულები არიან სამშენებლო ბიზნესში.

ვითომდა კვლევები, სოციოლოგები, თითქმის ყველა დეტალი ერთ მთლიან ჯაჭვში მოქმედებს და ემსახურება თვითმმართველობის არჩევნებს.

სამწუხაროდ, მქონდა იმედი, რომ რიგი პოლიტიკოსები გაიზრდებოდნენ და გადავიდოდნენ უფრო კონსტუქციულ ურთიერთობაში, თუნდაც ხელისუფლებასთან, მეგობარ პარტიებთან და რაც მთავარია, საზოგადოებასთან. ევროპული გამოცდილება არის ზუსტად ეს დიპლომატია და კონსტრუქციულობა, საზოგადოება იზრდება და პოლიტიკოსებსაც ადეკვატური ქმედებები მოეთხოვებათ", - განაცხადა ზურაბ ქადაგიძემ.

მონიკა დავლიანიძე