საზოგადოება

სავარაუდო თაღლითური სქემა - თარჯიმნებს კომპანია „თბილისის ბიზნესსახლი“ ანაზღაურებას არ უხდის

თარჯიმნები კომპანია „თბილისის ბიზნესსახლს“ აუნაზღაურებელი შრომისთვის უპირისპირდება. თარჯიმნების განცხადებით, კომპანია მათ ანაზღაურებას დიდი ხანია არ უხდის, ზოგიერთი თარჯიმნისთვის კომპანიას ათობით ათასი ლარი მართებს.

პროფესიული კავშირი ”სოლიდარობის ქსელის” წევრის, ნენე ჩარკვიანის განცხადებით, „თბილისის ბიზნესსახლი“ სხვადასხვა ტენდერში იმარჯვებს, თუმცა უცნობია, სად მიდის ეს თანხა. მისი ვარაუდით, აღნიშნულ სიტუაციაში ადგილი აქვს თაღლითურ სქემას.

„ჩვენ გვყავს ისეთი თარჯიმნები, რომლებთათვის თვითონ კომპანიას აქვს დაახლოებით ათასობით ლარის დავალიანება. ასევე ჩვენ გვაქვს იმის დამადასტურებელი საბუთი, რომ მოგებული ტენდერებისთვის მას აქვს აღებული გარკვეული სახის თანხები, რომელიც არ ვიცით, სად წავიდა.

ჩვენ ვითხოვთ ფინანსთა სამინისტროს საგამოძიებო სამსახურს, რომ გამოიძიოს ეს სიტუაცია კარგად და გაიგოს, რა სახის თაღლითურ სქემასთან გვაქვს საქმე. ფაქტია, ამ კომპანიას აქვს გარკვეული თანხები რომელიც არამიზნობრივად იხარჯება და ასევე სახელწმიფო სტრუქტურებს ვთხოვთ, რომ პასუხისმგებლობა გამოიჩინონ და აკონტროლონ ის კერძო კომპანიები, რომლებსაც აგებინებენ ამ სახის ტენდერებს“,- განაცხადა ჩარკვიანმა.

დაზარალებული თეო ღავთაძის განცხადებით, კომპანიაში დავალიანების ორ წელიწადზე გადანაწილება შესთავაზეს. მისი თქმით, ეს პირობა მათთვის მიუღებელია.

ბრლადებების ადრესატ კომპანიაში კომენტარს არ აკეთებენ.

ცნობისთვის, აღნიშნული კომპანია, რომელიც სახელმწიფო ტენდერებს იგებს, ვალდებულია, რომ სხვადასხვა სახელმწიფო დაწესებულებებში თარჯიმნები მიავლინოს.