პოლიტიკა

საუბარი, რომ დროულად მოვიცილოთ ბიძინა ივანიშვილის რეჟიმი, ცოტა მკრეხელურიცაა - რევაზ არველაძე

ოპოზიციის წარმომადგენლებმა ღიად განაცხადეს თავიანთი გეგმების შესახებ, რომ მათი მიზანია რაც შეიძლება მეტი ზიანი მიაყენონ ხელისუფლებას. ხელისუფლებისთვის ზიანის მიყენება დიდწილად თუ ყოველთვის არა, გულისხმობს ქვეყნისთვის ზიანის მიყენებას, – განაცხადა დღეს გამართულ პრესკონფერენციაზე საპარლამენტო უმრავლესობის წევრმა, რევაზ არველაძემ.

„მე ერთადერთი შემიძლია ჩვენს ხელისუფლებას ვურჩიო, საკუთარი თავის ჩათვლით, როგორც საპარლამენტო ასევე აღმასრულებელ და სასამართლო ხელისუფლებას, რომ არცერთი წინადადება განსახილველიც კი არ არის ოპოზიციის მიერ დაყენებული, ვინაიდან, ეს ყველაფერი ემსახურება ზიანის მიყენებას ხელისუფლებისთვის ანუ ჩემი აზრით, ქვეყნისთვის.

საუბარი იმაზე, რომ ბიძინა ივანიშვილი არის არაფორმალური მმართველი, ეს ნამდვილად არ არის ასე. ის არ ერევა პოლიტიკურ საქმიანობაში. საუბარი, რომ ჩვენ დიდი ზიანი უნდა მივაყენოთ ხელისუფლებას, რათა დროულად მოვიცილოთ ბიძინა ივანიშვილის რეჟიმი – ჩემი აზრით, ცოტა მკრეხელურიცაა, რადგან ამ ხალხს სიტყვა რეჟიმის ხმარების უფლებაც კი არ უნდა ჰქონდეთ!“, – განაცხადა რევაზ არველაძემ.

ნინო ექვთიმიშვილი