პოლიტიკა

სასურველია, მომავალში საარჩევნო კამპანია ჩავატაროთ ისე, რომ სტრესი არ მივაყენოთ ჩვენს მოქალაქეებს - თამარ ჩუგოშვილი

„წინასაარჩევნო პროცესი ნამდვილად არ ყოფილა ისეთი, რომლითაც ჩვენ ქვეყანას შეუძლია იამაყოს, სამწუხაროდ, ეს იყო ძალიან მძიმე, ნეგატიური, პოპულიზმით, ურთიერთბრალდებებით, შეტევებითა და შეურაცხყოფებით აღსავსე“< – ამის შესახებ პარლამენტის პირველმა ვიცე-სპიკერმა, თამარ ჩუგოშვილმა განაცხადა.

მისი თქმით, მთლიანად საარჩევნო პროცესი ძალიან დაძაბულ გარემოში მიმდინარეობს.

„დარწმუნებული ვარ, ჩვენი მოქალაქეები ელოდებიან, დროულად დასრულდეს აღნიშნული პროცესი, რადგან მარტივი ასატანი არ არის, რა ფორმებიც მიიღო ამ ყველაფერმა“, – განაცხადა ჩუგოშვილმა.

დეპუტატის ვარაუდით, საპრეზიდენტო არჩევნების მეორე ტური სალომე ზურაბიშვილის გამარჯვებით დასრულდება.

„რაც შეეხება არჩევნების შედეგებს, არა მგონია, რომ რამე განსაკუთრებულ პრობლემას შეიძლება, ელოდეს ქვეყანა. ვფიქრობ, არჩევნები დასრულდება სალომე ზურაბიშვილის გამარჯვებით. ამის ყველანაირი მოლოდინი გვაქვს და არა მგონია, რაღაც განსაკუთრებული პრობლემა უნდა მივიღოთ ამ ყველაფრით“, – თქვა ჩუგოშვილმა.

მისივე თქმით, სასურველია, რომ სამომავლოდ საარჩევნო კამპანიები მოსახლეობისთვის სტრესის მომტანი არ იყოს.

„სასურველია, მომავალში მაინც ყველამ ერთად შევძლოთ, საარჩევნო კამპანია ჩავატაროთ ისე, რომ სტრესი არ მივაყენოთ ჩვენს მოქალაქეებს და არ ვაყურებინოთ ბინძური კამპანიები“, – აღნიშნა ჩუგოშვილმა.