სამართალი

სასამართლოს ნიკა მელიას ეტაპირება ოფიციალურად მოვთხოვეთ, პროცესზე მას საშუალება მიეცემა თავად მოყვეს კრიმინალური აქტის თაობაზე - ადვოკატი

ნიკა მელიას ადვოკატებმა სასამართლოს ოფიციალური წერილით მიმართეს. უფლებადამცველები ითხოვენ, რომ დღევანდელ პროცესზე ოპოზიციონერი ლიდერის ეტაპირება მოხდეს, სადაც ნიკა მელია თავად მოყვება მისი გატაცების სპეცოპერაციის შესახებ.

კოალიცია "ცვლილებისთვის" ლიდერს წულუკიანის კომისიაზე არ მისვლის გამო ასამართლებენ. მას აღნიშნულ საქმეზე 50 000 ლარიანი გირაო აქვს შეფარდებული.

„გუშინ, ღამის საათებში ნიკა მელია კრიმინალური წესით გაიტაცეს პოლიციის თანამშრომლებმა. ის ამჟამად მოთავსებულია წინასწარი დაკავების იზოლატორში. მისი ბრალდების საქმეზე დღეს, 14:00 საათზე ჩანიშნულია წინასასამართლოს სხდომა. ჩვენ რამდენიმე წუთის წინ, სასამართლოს წერილობით ოფიციალურად მივმართეთ და მოვთხოვეთ, რომ ვინაიდან ნიკა მელია უკანონოდ არის დატყვევებული, პოლიციის თანამშრომლების მიერ, უზრუნველყოს ნიკა მელიას ეტაპირება დღევანდელ სასამართლო პროცესზე, სადაც მას შესაძლებლობა მიეცემა დეტალებში მოყვეს იმ კრიმინალური აქტის თაობაზე, რომელსაც გუშინ მასთან მიმართებით ჰქონდა ადგილი პოლიციის ათეულობით მუშაკის მხრიდან. აქედან, გამომდინარე, ბრალდებულის უფლებაა ესწრებოდეს მის სასამართლო პროცესს. დიდი იმედი გვაქვს, რომ მოსამართლე შვანგირაძე კანონს არ დაარღვევს და უზრუნველყოფს ბრალდებულის მოყვანას სასამართლოში, სადაც გავიგებთ უფრო მეტ დეტალს იმ დანაშაულების შესახებ, რასაც გუშინ ღამით მისი დაკავებისას ჰქონდა ადგილი”, - განაცხადა გიორგი კონდახიშვილმა.