სამართალი

სასამართლოს მიერ ფულის ლეგალიზაციის მუხლის გაუთვალისწინებლობას გავასაჩივრებთ - დავით გუმბერიძე

სამშენებლო კომპანია „ცენტრ პოინტის“ საქმის პროკურორის დავით გუმბერიძის განცხადებით, ბრალდების მხარე, 194 -ე მუხლის ნაწილს, რომელიც სასამართლოს მიერ არ იქნა გაზიარებული, ზემდგომ ინსტანციაში გაასაჩივრებს.

საუბარია, მესამე მუხლზე, რომელიც უკანონო შემოსავლის ლეგალიზაციას, ფულის გათეთრებას გულისხმობს, და რომელიც სასამართლოს მიერ დღეს გამოტანილ გადაწყვეტილებაში გათვალისწინებული არ ყოფილა.

„ჩვენს მიერ წარდგენილი მტკიცებულებები სასამართლომ სრულად გაიზიარა. კერძოდ, ბრალდებულები დამნაშავედ ცნო თაღლითობისა და მითვისების ეპიზოდში და საბოლოო სასჯელით, ამნისტიის გათვალისწინებით, განესაზღვრათ 4 წლით თავისუფლების აღკვეთა. რაც შეეხება ლეგალიზაციის ეპიზოდს, ბრალდების მხარე ამ ნაწილშიც ფიქრობს, რომ საკმარისი მტკიცებულებები იქნა წარდგენილი. როდესაც განაჩენი ჩაგვბარდება, მას გადავხედავთ და ამ ნაწილშიც გავასაჩივრებთ მიღებულ გადაწყვეტილებას“,-აღნიშნა პროკურორმა.

ამასთან, გუმბერიძემ საზოგადოებას განუმარტა, რომ ბრალდების მხარემ რუსუდან კერვალიშივლსა და მაია რჩეულიშვილს საპროცესო გარიგება მხოლოდ და მხოლოდ ერთი პირობის შესრულების სანაცვლოდ შესთავაზა.

კერძოდ, ბრალდების მხარის მოთხოვნით, ცენტრ პოინტის 6 ათასამდე დაზრალებულის ზიანის ანაზღაურება უნდა მომხდარიყო, ან დასრულებულიყო დაწყებული ობიეიქტების მშენებლობა.

„ ბრალდების მხარის მიერ შეთავაზებულ იქნა პირობა, რომ გაფორმდებოდა საპროცესო შეთანხმება მხოლოდ და მხოლოდ ერთი პირობის გათვალისწინებით - თუ ყველა დაზარალებულს, ანუ 6 ათასივე პირს, აუნაზღაურდებოდათ ზიანი, ან დასრულდებოდა მათ მიერ დაწყებული სამშენებლო ობიექტების მშენებლობა. თუმცა, ამ პერიოდის განმავლობაში მათ ჩვენს მიერ შეთავაზებული პირობა არ გამოიყენეს“,-განაცხადა დავით გუმბერიძემ.

„ამხანაგობა თაბუკაშვილი 88“-ის საქმეში, ბრალდების მხარე რუსუდან კერვალიშვილსა და მაია რჩეულშვილს სამი მუხლით ედავებოდა: 180-ე მუხლით, რაც თაღლითობას გულისხმობს; 182-ე მუხლით, მითვისება ან გაფლანგვა და 194-ე მუხლი -უკანონო შემოსავლის ლეგალიზაცია (ფულის გათეთრება), რაც თავისუფლების აღკვეთას 12 წლით ვადით გულისხმობს.

თუმცა, საქალაქო სასამართლომ რჩეულიშვილი და კერვალიშვილი დანმაშავედ მხოლოდ 180-ე და 182-ე ნაწილში ცნო, და ბრალდებულებს 4-4 წლით თავისუფლების აღკვეთა მიუსაჯა.

მონიკა დავლიანიძე