სამართალი

სასამართლოს განაჩენი უდანაშაულობაზე არ ნიშნავს, რომ მოხდა პოლიციელის მიერ ნარკოტიკის ჩადება - შალვა ხუციშვილი

საქართველოს შინაგან საქმეთა მინისტრის მოადგილე შალვა ხუციშვილი აცხადებს, რომ ნარკოდანაშაულის საქმეზე სასამართლოს გამამართლებელ განაჩენებს ვერ შეაფასებს.

„სასამართლოს გადაწყვეტილებას ვერ შევაფასებ. მინდა ხაზი გავუსვა, რომ თავისთავად სასამართლოს განაჩენი უდანაშაულობაზე, არ ნიშნავს, რომ მოხდა პოლიციელის მიერ ნარკოტიკის ჩადება. პირდაპირ ამისი თქმა არასწორი იქნება, მათ შორის სამართლებრივადაც. დანარჩენი მიმდინარე საქმეებია და ამაზე მეტ კომენტარს ვერ გავაკეთებ“, - აცხადებს ხუციშვილი.

მინისტრის მოადგილე შეეხო იმ საკითხსაც, თუ რატომ ფიგურირებს „ჩადების“ ყველა საქმეში დეტექტივების სამმართველოს თანამშრომელი ვინმე სიგუა.

„დეტექტივების სამმართველო ფიგურირებს ათას სხვა გახსნილ საქმეში, რა განაჩენებიც უკვე დადგა და ხალხი პასუხისგებაშია მიცემული. დეტექტივების სამმართველო არის ერთ-ერთი ყველაზე საპასუხისმგებლო საქმეების განმახორციელებელი სამმართველო“, - ამბობს შს მინისტრის მოადგილე.

თბილისის საქალაქო სასამართლომ ბოლო პერიოდში რამდენიმე გახმაურებულ საქმეზე ნარკოდანაშაულში ბრალდებული პირები სასამართლო დარბაზიდან გაათავისუფლა.

10 ივლისს, ნარკოდანაშაულში ბრალდებული ბაჩო სირაძე მოსამართლემ გირაოს საფუძველზე გაათავისუფლა.

მანამდე, სასამართლომ ნარკოტიკების შეძენა-შენახვაში ბრალდებული მიხეილ თათრიშვილი გაამართლა.

12 ივნისს, კი ჯგუფ Birja Mafia-ს წევრი გიორგი ქებურია სააპელაციო სასამართლომ 20 ათასი ლარის გირაოს სანაცვლოდ გაათავისუფლა. მანამდე სააპელაციო სასამართლომ პატიმრობიდან ჯგუფ „ბირჟა მაფიას “ კიდევ ერთი წევრი მიშა მგალობლიშვილი გაათავისუფლა.

ნინო ექვთიმიშვილი