სამართალი

სასამართლომ ჟურნალისტ დეა მამისეიშვილს და აქტივისტ მარიამ გეგუჩაძეს 3000-3000, ხოლო გიგა მაქარაშვილს და მიშა მშვილდაძეს 4000-4000 ლარიანი ჯარიმა დააკისრა

თბილისის საქალაქო სასამართლომ პოლიტიკური თანამდებობის პირის შეურაცხყოფის საქმეზე აქტივისტები მარიამ გეგუჩაძე და გიგა მაქარაშვილი, ასევე ჟურნალისტები დეა მამისეიშვილი და მიშა მშვილდაძე სამართალდამრღვევად ცნო.

სასამართლომ ადმინისტრაციული სახდელის სახით მარიამ გეგუჩაძესა და დეა მამისეიშვილის 3000-3000 ლარიანი ჯარიმა დააკისრა, ხოლო გიგა მაქარაშვილს და მიშა მშვილდაძეს 4000 -ლარიანი ჯარიმის გადახდა დაეკისრა.

ინფორმაციისათვის, ადმინისტრაციული სამართალდარღვევის შესახებ ფრაქცია „ქართული ოცნების“ თავმჯდომარის 2025 წლის 6 ივნისს წარმოდგენილი განცხადება/საჩივრის საფუძველზე, საქართველოს შინაგან საქმეთა სამინისტრომ დაიწყო ადმინისტრაციული საქმის წარმოება საქართველოს ადმინისტრაციულ სამართალდარღვევათა კოდექსის 173 (16) მუხლის საფუძველზე. აღნიშნული კი გულისხმობს საქართველოს სახელმწიფო-პოლიტიკური თანამდებობის პირის, პოლიტიკური თანამდებობის პირის სიტყვიერ შეურაცხყოფას, ლანძღვა-გინებას, მასზე შეურაცხმყოფელ გადაკიდებას ან/და მის მიმართ სხვაგვარი შეურაცხმყოფელი ქმედების განხორციელებას სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით.