პოლიტიკა

სასამართლო რეფორმა ძალიან სწრაფადაა გასატარებელი, ყველა შესაბამისი მხარის ჩართულობით - ანა ნაცვლიშვილი

საქართველოს პრეზიდენტის საპარლამენტო მდივანი, ანა ნაცვლიშვილი სასამართლო კრიზისის დაძლევის საკითხებთან დაკავშირებით სასამართლო რეფორმაზე მომუშავე ჯგუფის - "კოალიცია დამოუკიდებელი და გამჭვირვალე მართლმსაჯულებისათვის" მოსაზრებით დაინტერესდა.

პრეზიდენტის სასახლეში გამართულ შეხვედრაზე კოალიციის წევრებისაგან ანა ნაცვლიშვილმა პარლამენტის მიერ სასამართლო რეფორმის მორიგ ტალღასთან დაკავშირებით მიღებულ კანონზე შემუშავებული შენიშვნები და წინადადებები მოისმინა.

ნაცვლიშვილის განცხადებით, სასამართლო სისტემაში შექმნილ მძიმე კრიზისის მოგვარებისთვის სხვა ფაქტორებთან ერთად რეალური საკანონმდებლო ცვლილებების გატარებაა აუცილებელი.

"შეხვედრა გვქონდა იმ ადამიანების ჯგუფთან, რომლებიც წლებია მონიტორინგს უწევენ სასამართლო სისტემაში არსებულ სიტუაციას და ამზადებენ რეკომენდაციებს როგორ უნდა შეიცვალოს მდგომარეობა, მათ შორის, საკანონმდებლო თვალსაზრისით.

ეს ჯგუფი, ისევე როგორც საზოგადოების სხვა წევრები, ამბობენ, რომ აუცილებელია, კონკრეტული, პრიორიტეტული მიმართულებებით გაგრძელდეს და დროულად მოხდეს საკანონმდებლო ცვლილების გატარება - ეს მოიცავს საბჭოს საქმიანობის დარეგულირებას კანონით, მოიცავს იუსტიციის სკოლის დამოუკიდებლობის გარანტიების შექმნას, მოიცავს დისციპლინური სამართალწარმოების წესის პროცედურების საფუძვლების გამართვას და ბევრი სხვა საქმეა გასაკეთებელი და ამ მიმართულებით, დრო სასამართლო სისტემის დამოუკიდებლობის საწინააღმდეგოდ მუშაობს. ამიტომ რეფორმა ძალიან სწრაფადაა გასატარებელი, ყველა შესაბამისი მხარის ჩართულობით", - აღნიშნა ანა ნაცვლიშვილმა.

მისივე თქმით, მოლოდინიც არის სწორედ ის, რომ პარლამენტი რეალურად დროულად მიიღებს ცვლილებას.