სამართალი

საქმეში არსებობს არაერთი ვიდეომასალა, სადაც ისმის, თუ როგორ ითხოვს დათა ახალაია მეტ დაკავებულს - 26 მაისის აქციის დარბევის საქმის პროკურორი

თბილისის საქალაქო სასამართლოში, 26 მაისის აქციის დარბევის საქმეზე ბრალდების მხარე ერთ-ერთ დაზარალებულს დაკითხავს.

საქმის პროკურორის გიორგი მუჯირის განცხადებით, აღნიშნული პირი ისაუბრებს, როგორ განვითარდა 26 მაისს პროცესები.

„ეს არის ადამიანი, რომელსაც ფიზიკურად გაუსწორდნენ იმ პირობებში, როდესაც მას სურდა ტერიტორიის დატოვება. ბრალდების არსიც სწორედ ამაში მდგომარეობს, რომ სამართალდამცველებმა აქციის მონაწილეები ორგანიზებულად მოაქციეს ალყაში, არ მისცეს ტერიტორიის თავისუფლად დატოვების საშუალება.

საქმეზე ათეულობით მოწმეა გამოკითხული. საქმეში არსებობს არაერთი ვიდეომასალა, როგორც მასმედიით გავრცელებული, ასევე ოპერატიული, სადაც ისმის, თუ როგორ ითხოვს დავით ახალაია მეტ დაკავებულს და ამ დაკავებულებზე ჰპირდება მეტ პრემიას", - განაცხადა მუჯირმა პროცესის დაწყებამდე.
26 მაისის აქციის დარბევის საქმეზე ძალის გამოყენებით უფლებამოსილების გადამეტებისთვის ბრალი შინაგან საქმეთა სამინისტროს ხუთ ყოფილ მაღალჩინოსანს აქვს წარდგენილი.

მათ შორის არიან შინაგან საქმეთა მინისტრის ყოფილი მოადგილე გიორგი ლორთქიფანიძე, კონსტიტუციური უსაფრთხოების დეპარტამენტის ყოფილი უფროსი დათა ახალაია, ასევე, ვასილ ლელუაშვილი, რევაზ შიუკაშვილი და ლევან ქარდავა.