პოლიტიკა

საქართველოში სახნავი მიწა 600 000 ჰექტარზე ოდნავ მეტია და ამ რესურსების მართვა განსაკუთრებულ პასუხისმგებლობას მოითხოვს - ლევა დავითაშვილი

სოფლის მეურნეობის მინისტრის, ლევან დავითაშვილის განცხადებით, საქართველო მცირემიწიანი ქვეყანაა, რის გამოც მთავრობამ და პარლამენტმა მიიღო გადაწყვეტილება მიწის გასხვისების შეჩერების შესახებ.

დავითაშვილის თქმით, ამ თემაზე შესაბამისი საკანონმდებლო რეგულაციები იქნება შემუშავებული.

„ვიცით, რომ საქართველო არის მცირემიწიანი ქვეყანა. სასოფლო სამეურნეო მიწის რესურსები არის მნიშვნელოვნად შეზღუდული. რელიეფის გათვალისწინებით სახნავი მიწა 600 000 ჰექტარზე ოდნავ მეტი გვაქვს, ხოლო „საქსტატის აღწერით“ 643 000 დარეგისტრირებული მეურნეობა გვაქვს ანუ რესურსები შეზღუდულია. შესაბამისად, ამ რესურსების მართვა უნდა იყოს განსაკუთრებული პასუხისმგებლობით. ეს ესმის, როგორც საქართველოს მთავრობას, ისე საქართველოს პარლამენტის უმრავლესობას. ამიტომ, ჩვენ მივიღეთ გადაწყვეტილება მიწის გასხვისების შეჩერების შესახებ. შემდგომში ჩვენ გვინდა, რომ საკანონმდებლო საფუძველი იყოს მყარი იმისთვის, რომ ქართული მიწა იყოს საიმედო ხელში. ამიტომ, მოხდება საკონსტიტუციო ჩანაწერით ასეთი გადაწყვეტილების გამყარება“, - განაცხადა მინისტრმა.

რაც შეეხება მიწების გასხვისების შეჩერების საკითხზე საინვესტიციო საბჭოს კრიტიკას, სოფლის მეურნეობის მინისტრის განცხადებით, მთავრობის გადაწყვეტილების ახსნა-განმარტების შემდეგ საბჭოს წევრების უმრავლესობამ ამ ინიციატივას გაგებით მოეკიდა.

„საინვესტიციო საბჭოს წევრების აბსოლუტური უმრავლესობა გაგებით მოეკიდა მთავრობის გადაწყვეტილებას, როცა მათ მიიღეს მეტი ინფორმაცია ჩვენის მხრიდან. იყო ტექნიკური კითხვები. ვფიქრობ, შევჯერდებით და არ იქნება პრობლემები“, - განაცხადა დავითაშვილმა.

ანა მებურიშვილი