პოლიტიკა

საქართველოში ოპერირების დაწყებიდან დღემდე „ბიტფიური ჯგუფს“ არ უსარგებლია არანაირი პრივილეგიით - კომპანია ოპოზიციის ბრალდებებს პასუხობს

ტექნოლოგიური კომპანია „ბიტფიური ჯგუფის“ წარმომადგენელი ეფრემ ურუმაშვილი გამოეხმაურა „ევროპული საქართველოს“ განცხადებას, რომელმაც ელექტროენერგიაზე გადასახადის ზრდა ამ კომპანიის საქმიანობას დაუკავშირა.

როგორც კომპანიის განცხადებაშია ნათქვამი, ჯგუფი არ სარგებლობს არანაირი პრივილეგიით და ამის დასადასტურებლად „ბიტფიური“ კვირის ბოლომდე გამოაქვეყნებს კომუნალური გადასახადების შესახებ დეტალურ ინფორმაციას.

„გვსურს, ღიად დავაფიქსიროთ ოფიციალური პოზიცია, რომ კომპანია ბიტფიური, რომელიც უმსხვილესი გლობალური ტექნოლოგიური კომპანიაა (თითქმის 1 მლრდ კაპიტალიზიაციით) 2014-2015 წწ „ბიტფიური ჯგუფი“ სარგებლობდა სესხით „თანაინვესტირების ფონდიდან“, რომელიც 2015 წელს ჩანაცვლდა „საქართველოს ბანკისგან“ (BOG) მიღებული საბანკო სესხით, ვისთანაც დღემდე ვიმყოფებით ფინანსურ-საქმიან ურთიერთობაში.

ისლანდიის, ნორვეგიისა და კანადის მსგავსად, საქართველოში „ბიტფიური ჯგუფი“ ფლობს მაინინგის ცენტრებს, მაგრამ გორში მაინინგი დიდი ხანია, აღარ ხდება, შესაბამისად, იქ ჭარბი ელექტროენერგიის საჭიროება არ არსებობს (იქ მხოლოდ ტექნიკური მხარდაჭერის ცენტრია) და მხოლოდ თბილისის (გლდანის რაიონში მდებარე) დატა ცენტრში მიმდინარეობს მაინინგი.

რაც შეეხება დენის საფასურს, მის გადახდებს, ტარიფებსა და შესაძლოა, პრივილეგიებს, რაზეც ჩვეულად და თავის სტილში აპელირებს ქართველი პოლიტიკოსების ნაწილი, აქაც მთელი პასუხისმგებლობით გვსურს განვაცხადოთ, რომ საქართველოში ოპერირების დაწყებიდან დღემდე, არცერთ ეტაპზე „ბიტფიური ჯგუფს“ არ უსარგებლია არანაირი პრივილეგიით ან შეღავათით. ამის დასტურად ჩვენი კომპანია - მიმდინარე კვირის ბოლომდე გამოაქვეყნებს - კომუნალური (ელექტროენერგიის შესყიდვა-გადახდის) გადასახადების შესახებ დეტალურ ინფორმაციას”,- ნათქვამია განცხადებაში.

„ევროპული საქართველოს“ მტკიცებით, კომპანია „ბიტფიური“ ბიძინა ივანიშვილის მიერ თბილისის თავისუფალ ზონაში გახსნილი დატა ცენტრია, სადაც კრიპტოვალუტის -ბიტკოინების გამომუშავება ხდება. პარტიის განცხადებით, მისი გახსნიდან (2015 წლის 15 დეკემბრიდან) თბილისის მოხმარება დღეში 40 მეგავატით გაიზარდა, რომლის გადახდა მოსახლეობას უწევს. „ევროპულმა საქართველომ“ აღნიშნა, რომ თვითონ „ბიტკოინების ქარხანა“ შეღავათიანი პირობებით სარგებლობს და როგორც თავისუფალ ზონაში განლაგებული ობიექტი, დენში 5 ცენტს ( გახსნის მომენტში დაახლოებით 10 ცენტი იყო) იხდის.