პოლიტიკა

საქართველოში მრავალშვილიანი ოჯახების სტატუსის განსაზღვრა და მათი ფინანსური მხარდაჭერა მოხდება

საქართველოში მრავალშვილიანი ოჯახების სტატუსის განსაზღვრა მოხდება. შესაბამის საკანონმდებლო ცვლილებებზე ჯანდაცვის საპარლამენტო კომიტეტის თავმჯდომარემ აკაკი ზოიძემ და მისმა მოადგილემ დიმიტრი ხუნდაძემ იმუშავეს.

ხუნდაძის განმარტებით, კანონპროექტის მიზანია მრავალშვილიანი ოჯახების მხარდაჭერაა სახელწმიფოს მხრიდან. მისივე თქმით, სახელმწიფო ბიუჯეტით დაფინანსებული იქნება მრავალშვილიანი ოჯახის ელექტროენერგიის სუბსიდია.

„კერძოდ, მრავალშვილიანი ოჯახი, რომელსაც ოთხი ბავშვი ჰყავს, ყოველთვიურად 20 ლარს მიიღებს, ხოლო ხუთ ან მეტშვილიანი ოჯახი მე-5 და მომდევნო ბავშვზე – დამატებით 10-10 ლარს. საქსტატის მონაცემებით, (2014 – საყოველთაო აღწერის შედეგები) 12369 შინამეურნეობაა, სადაც ოთხი და მეტი არასრულწლოვანი ცხოვრობს. შესაბამისად, სარგებლის სახით, ჯამური ფინანსური შედეგი წლიურად დაახლოებით 3 489 000 ლარი იქნება“, - თქვა ხუნდაძემ.

კანონპროექტი ითვალისწინებს შეღავათებს სოციალურად დაუცველი ოჯახებისთვისაც, რომელთა სარეიტინგო ქულა 300 000 -ის ტოლი ან მასზე ნაკლები იქნება.

„კანონპროექტის მრავალშვილიანი მშობლის სტატუსის მინიჭებისა და სოციალური დახმარების გაცემის წესს განსაზღვრავს საქართველოს მთავრობა 2018 წლის 1-ელ ივნისამდე. მსგავსი კანონპროექტი ევროპის უმეტეს და პოსტსაბჭოთა სივრცის ყველა ქვეყანაში მოქმედებს. საკითხზე მუშაობა დიდი ხანი მიმდინარეობდა, თუმცა, პროცესებს ქვეყნის მცირე ბიუჯეტი აფერხებდა. სტატუსი 2006 წელს გაუქმდა და ის 7 და მეტშვილიან ოჯახებს ენიჭებოდა.

ახალი კანონმდებლობით კი, მრავალშვილიანის სტატუსი 4 და მეტშვილიან ოჯახებს ექნებათ”, – განაცხადა ხუნდაძემ.

ანა მებურიშვილი