საზოგადოება

საქართველოში იშვიათი დაავადებების დღე აღინიშნა

საქართველოში იშვიათი დაავადებების დღე აღინიშნა. ღონისძიება თბილისში საქართველოს იშვიათი დაავადებების ალიანსის - “სიდა” ორგანიზებით გაიმართა. მას ჯანდაცვის მინისტრის მოადგილე თეა გიორგაძე, ექიმები, პაციენტები და მათი ოჯახების წევრები დაესწრნენ.

როგორც “სიდას” დამფუძნებლებმა განმარტეს, იშვიათ დაავადებებს მიეკუთვნება მძიმე, სიცოცხლისთვის საშიში დაავადებები, რომელთა რაოდენობა მოსახლეობაში იმდენად დაბალია, რომ მათთან ბრძოლა სპეციალურ ერთობლივ ძალისხმევას მოითხოვს.

“ხსენებული დაავადებები ერთეულ ადამიანებში გვხვდება, ჯამში კი მსოფლიოში 300 მილიონს შეადგენს. ეს კი მსოფლიოს მოსახლეობის დაახლოებით 6 პროცენტია. დაავადებულთა 70 პროცენტი ბავშვია”, - განაცხადა “სიდას” თანადამფუძნებელმა ჟანა ჩოხელმა.

მისივე ინფორმაციით, საქართველოში ერთ-ერთ მთავარ გამოწვევად დაავადებულთა სტიგმატიზაცია რჩება. პრობლემატურია დიაგნოზის დროულად დასმისა და სწორად შერჩეული მკურნალობის საკითხიც. პაციენტს სწორი დიაგნოზის დასასმელად ზოგჯერ 6-7-წლით ლოდინიც კი უწევს. გვხვდება მცდარი დიაგნოზის დასმის შემთხვევებიც. გარდა ამისა, პაციენტებს არ აქვთ საზღვარგარეთ მკურნალობის საშუალება.

ალიანსის თანადამფუძნებელ მარიამ ცინცაძის თქმით, იშვიათი დაავადებების შესახებ ქართულ ენაზე მწირი ინფორმაცია მოიპოვება.

ახლად დაფუძნებული ორგანიზაციის მთავარი მიზანია ქვეყანაში შესაბამისი განათლებისა და ცნობიერების დონის ამაღლება, პაციენტებისა და მათი ოჯახების წევრების ფსიქოლოგიური მხარდაჭერა, თბილისსა და დიდ ქალაქებში საგანმანათლებლო და სარეაბილიტაციო ცენტრების შექმნა.

შეხვედრაზე ასევე სიტყვით გამოვიდნენ “სიდას” წარმომადგენლები: ია მგალობლიშვილი, თამარ მახათაძე, გვანცა კვანტალიანი და სხვები, რომელთაც დამსწრეებს ცალკეული დაავადებების შესახებ ინფორმაცია გაუზიარეს.

იშვიათ დაავადებათა მსოფლიო დღეს ყოველწლიურად ტარდება საინფორმაციო-საგანმანათლებლო ღონისძიებები, რომლის მიზანსაც აღნიშნულ დაავადებების მქონე პირთა პრობლემებისადმი საზოგადოების ყურადღების მიპყრობა წარმოადგენს.