საზოგადოება

საქართველოში გადმორიცხული ფულადი გზავნილების რაოდენობა 9.6%-ით შემცირდა

მიმდინარე წლის მაისში საქართველოში გადმორიცხული ფულადი გზავნილების რაოდენობა წინა წლის ანალოგიურ პერიოდთან შედარებით 9.6%-ით შემცირდა. ამის შესახებ საქართველოს ეროვნული ბანკის მიერ გამოქვეყნებულ ფულადი გზავნილების სტატისტიკაშია აღნიშნული.

უფრო კონკრეტულად, 2020 წლის მაისში ქვეყანაში შემოსული ფულადი გზავნილების ნაკადების მოცულობამ 131.8 მლნ აშშ დოლარი (421.6 მლნ ლარი) შეადგინა, რაც 9.6%-ით (13.9 მლნ აშშ დოლარით) ნაკლებია 2019 წლის მაისის ანალოგიურ მაჩვენებელზე.

უცხოეთიდან საქართველოში ფულადი გზავნილების 92.8% იმ 14 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ მაისში 1 მლნ აშშ დოლარს გადააჭარბა. იმავე 14 ქვეყანაზე გასული წლის მაისში მთელი ფულადი გზავნილების 89.9% მოდიოდა. ამასთან, 2020 წლის მაისში საქართველოდან საზღვარგარეთ 13.6 მლნ აშშ დოლარი (43.4 მლნ ლარი) გადაიგზავნა, რაც 2019 წლის მაისის (20.5 მლნ აშშ დოლარი) ანალოგიურ მაჩვენებელთან შედარებით 33.7%-ით ნაკლებია.