პოლიტიკა

საქართველოსა და რუსეთს შორის შეხვედრა შესაძლებელია მხოლოდ მაშინ, როცა ამ შეხვედრას კონკრეტული მიზანი ექნება - სოფო ქაცარავა

საგარეო ურთიერთობათა საპარლამენტო კომიტეტის თავმჯდომარის, სოფო ქაცარავას განცხადებით, საქართველოსა და რუსეთს შორის შეხვედრა შესაძლებელია მხოლოდ მაშინ, თუკი მცირე ნაბიჯი ინება გადადგმული საქართველოს ტერიტორიული მთლიანობის აღსადგენად.

„არაერთხელ გვითქვამს, რომ საქართველოსა და რუსეთს შორის შეხვედრა შესაძლებელია მხოლოდ მაშინ, როცა ამ შეხვედრას კონკრეტული მიზანი ექნება. ეს კონკრეტული მიზანი ტერიტორიულ მთლიანობასთან დაკავშირებული საკითხებია და თუ მცირე ნაბიჯი გადაიდგმება იმისკენ, რომ ეს პრობლემა მოგვარდეს. სხვა შემთხვევაში შეხვედრა – შეხვედრისთვის არ უნდა შედგეს. სხვა მოცემულობები და შესაძლებლობები იყო, როცა პრეზიდენტს შეეძლო, პრემიერ-მინისტრ გიორგი კვირიკაშვილის განცხადებისთვის მხარი დაეჭირა“, - უთხრა ჟურნალისტებს ქაცარავამ.

რაც შეეხება რუსეთის საგარეო საქმეთა მინისტრის მოადგილის, გიორგი კარასინის განცხადებას, ქაცარავამ აღნიშნა, რომ საქართველოს პოზიცია უცვლელია.

ცნობისთვის, კარასინმა საქართველოსა და რუსეთის პრეზიდენტებს შორის შეხვედრა არ გამორიცხა.

„თეორიულად შესაძლებელია შეხვედრა ყველა დონეზე, მათ შორის უმაღლეს დონეზე, მაგრამ ამისთვის კარგი მომზადება სჭირდება“, - უპასუხა კარასინმა კითხვას, შესაძლებელია თუ არა, წელს გაიმართოს საქართველოსა და რუსეთის პრეზიდენტებს შორის შეხვედრა.

ანა მებურიშვილი