პოლიტიკა

საქართველოს უზენაესი სასამართლოს თავმჯდომარის კონკურსის გამოცხადებას კონსულტაციები და შეხვედრები არ სჭირდება - თამარ ჩუგოშვილი

პარლამენტის პირველი ვიცე-სპიკერის, თამარ ჩუგოშვილის განცხადებით, საქართველოს უზენაესი სასამართლოს თავმჯდომარის კონკურსის გამოცხადებას კონსულტაციები და შეხვედრები არ სჭირდება.

მისი თქმით, უზენაესი სასამართლოს თავმჯდომარის არჩევა მნიშვნელოვანი პროცესია და მართლმსაჯულების სისტემაში მიმდინარე რეფორმებზე მნიშვნელოვანი გავლენა ექნება.

„რამდენადაც მაქვს ინფორმაცია, პრეზიდენტი აპირებს, რომ ღია კონკურსი გამოაცხადოს კანდიდატის შერჩევასთან დაკავშირებით, ამიტომ ეს კონსულტაციები ცოტა გაუგებარია, რას ემსახურება. როგორც ვხვდები, კონსულტაციები ტარდებოდა კონკურსის კრიტერიუმებთან დაკავშირებით, ეს კრიტერიუმები კი ყველასთვის ცნობილია. კანონმდებლობითა და კონსტიტუციით განსაზღვრულია, როგორი უნდა იყოს უზენაესი სასამართლოს თავმჯდომარე. მგონი, კონკურსის გამოცხადებას კონსულტაციები და შეხვედრები არ სჭირდება. ისინი წარმართავენ პროცესს, წარმოგვიდგენენ კანდიდატს და პარლამენტი შემდეგ ჩაერთვება. იმედია, ყველას ჩვენი ამოცანაა, რომ შევარჩიოთ, მოვძებნოთ ღირსეული ადამიანი, რომელიც შეძლებს და პოზიტიურ როლს შეასრულებს იმ პრობლემების დაძლევაში, რომელიც სასამართლო სისტემის შიგნით არსებობს“, – განაცხადა ჩუგოშვილმა.