პოლიტიკა

საქართველოს ტერიტორიული მთლიანობის მხარდაჭერით ჩვენ ჩვენს ქვეყნებს ვიცავთ - პაოლო ალი

ნატოს საპარლამენტო ასამბლეის პრეზიდენტის პაოლო ალის განცხადებით, საქართველოს უსაფრთხოების, მისი ტერიტორიული მთლიანობის დაცვით ნატო დასალეთის ქვეყნებსაც იცავს.

როგორც ალიმ აღნიშნა, საქართველო მეტწილად განსაზღვრავს რეგიონის სტაბილურობას.

ამის შესახებ ნატოს საპარლამენტო ასამბლეის პრეზიდენტმა საქართველოს პარლამენტის თავმჯდომარესთან ირაკლი კობახიძესთან და პარლამენტის თავდაცვისა და უშიშროების კომიტეტის თავმჯდომარესთან ირაკლი სესიაშვილთან ერთობლივ პრესკონფერენციაზე ისაუბრა.

„ჩვენ ვიცით, რომ ბოლო წლების განმავლობაში საქართველომ ძალიან დიდი მუშაობა გასწია, დიდი წვლილი შეიტანა უსაფრთხოების კუთხით, განსაკუთრებით ავღანეთში საერთაშორისო მისიების კუთხით. ეს არის მართლაც ძალიან დიდი წვლილი შეტანილი ჯარისკაცების მხრიდან და ჩვენ უფრო და უფრო მეტად გვესმის, რომ სტაბილურობა, უსაფრთხოება საქართველოში, მართლაც ძალიან მნიშვნელოვანია საერთოდ მთელი რეგიონის სტაბილურობისთვის და ამ რეგიონის სტაბილურობას ძალიან დიდი მნიშვნელობა აქვს ყველა დასავლეთის ქვეყნისათვის. ამიტომ შეიძლება ითქვას, რომ საქართველოს დაცვით, საქართველოს ტერიტორიული მთლიანობის მხარდაჭერით ფაქტობრივად ჩვენ ჩვენს ქვეყნებს ვიცავთ. ასე, რომ ეს არის მიზეზი იმისა, რომ ჩვენ გადავწყვიტეთ აქ ჩამოვსულიყავით“, - განაცხადა პაოლო ალიმ.

პაოლო ალის განცხადებით, ნატოს საპარლამენტო ასამბლეის საგაზაფხულო სესიის ჩატარება თბილისში ხაზს უსვამს ალიანსის მხარდაჭერას საქართველოსადმი.

შეგახსენებთ, დღეს დაიწყო ნატოს საპარლამენტო ასამბლეის საგაზაფხულო სესია, რომელიც 4 დღის განმავლობაში გაგრძელდება.

ანა მებურიშვილი