პოლიტიკა

საქართველოს საპარლამენტო დელეგაცია გაეროს ქალთა სტატუსის კომისიის მუშაობაში მიიღებს მონაწილეობას

„საქართველოს მიერ მიღწეულ წარმატებებზე და არსებულ გამოწვევებზე, ნიუ-იორკში, გაეროს მაღალი დონის ფორუმზე რამდენიმე პრეზენტაციას წარვადგენთ. ეს არის შესაძლებლობა, რომ შეკრებილ საზოგადოებას გავაცნოთ საქართველოს მიერ მიღწეული შედეგები ქალთა პოლიტიკური და ეკონომიკური ჩართულობის და ასევე ქალთა უფლებებისა და გენდერული თანასწორობის მიმართულებით. განვიხილოთ ისეთი მნიშვნელოვანი საკითხები, როგორიცა ტრეფიკინგთან ბრძოლის ღონისძიებები და შერჩევითი აბორტის თემატიკა, რაც სქესის ნიშნით შვილობილობის საკითხს მოიცავს“, - განაცხადა მარიამ ჯაშმა.

13 მარტს, ნიუ-იორკში, გაეროს შტაბ-ბინაში, ქალთა სტატუსის კომისიის 61-ე სხდომა მუშაობას იწყებს. ღონისძიებას საქართველოდან წარმომადგენლობითი დელეგაცია დაესწრება, რომელსაც პარლამენტის განათლების, მეცნიერებისა და კულტურის კომიტეტის თავმჯდომარე უხელმძღვანელებს. გაეროს მაღალი დონის ფორუმზე საქართველოს მხრიდან წარსადგენ საკითხებზე გაეროს წარმომადგენლობის თბილისის ოფისში მოსამზადებელი შეხვედრა გაიმართა.

სამუშაო შეხვედრაზე პარლამენტის განათლების, მეცნიერებისა და კულტურის კომიტეტის თავმჯდომარემ, ადამიანის უფლებათა და გენდერული თანასწორობის საკითხებში პრემიერმინისტრის თანაშემწემ, საქართველოში გაეროს განვითარების პროგრამის ხელმძღვანელმა და არასამთავრობო ორგანიზაციის წარმომადგენლებმა იმ მთავარ გზავნილებზე იმსჯელეს, რომლებიც პრეზენტაციების სახით, გაეროს ქალთა სტატუსის კომისიის ფარგლებში გამართულ შეხვედრებზე იქნება წარმოდგენილი.

გაეროს ქალთა სტატუსის კომისიის 61-ე სხდომას საქართველოდან პარლამენტის განათლების, მეცნიერებისა და კულტურის კომიტეტის თავმჯდომარე მარიამ ჯაში, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე, ადამიანის უფლებათა და გენდერული თანასწორობის საკითხებში პრემიერმინისტრის თანაშემწე სოფო ჯაფარიძე და ოთხი არასამთავრობო ორგანიზაციის წარმომადგენელი დაესწრება.