პოლიტიკა

საქართველოს საკითხი ძალიან აქტიურად დგას გაერო-ს დღის წესრიგში და ის დადგება მომდევნო სესიების განმავლობაშიც - თამარ ჩუგოშვილი

მომდევნო სესიების განმავლობაში გაერო-ს ადამიანის უფლებათა საბჭო მოისმენს ოკუპირებულ ტერიტორიებზე ადამიანის უფლებების მხრივ არსებულ მდგომარეობას და საქართველოს საკითხი მომდევნო სესიების განმავლობაში იქნება ძალიან აქტიურად განხილული გაერო-ს ფორმატში, - განაცხადა პარლამენტის პირველმა ვიცე-სპიკერმა, თამარ ჩუგოშვილმა გაერო-ში საქართველოს საკითხზე მიღებული რეზოლუციის შეფასებისას.

როგორც ჩუგოშვილმა საკანონმდებლო ორგანოში დღეს გამართულ ბრიფინგზე აღნიშნა, რეზოლუციაში კიდევ ერთხელ ხაზგასმულია საქართველოს სუვერენიტეტისა და ოკუპირებული ტერიტორიების თემა.

მისივე თქმით, ის მნიშვნელოვანია იმითაც, რომ გაერო აღნიშნავს საქართველოს ოკუპირებულ ტერიტორიებზე, ადამიანის უფლებების კუთხით მონიტორინგის აუცილებლობას.

,,ეს ნიშნავს იმას, რომ გაერო-ს სპეციალურ მომხსენებელს, ადამიანის უფლებათა საკითხებში, დაევალა შეისწავლოს საქართველოს ოკუპირებულ ტერიტორიებზე ადამიანის უფლებების კუთხით არსებული მდგომარეობა და შესაბამისი ანგარიში გააცნოს ადამიანის უფლებების საბჭოს მომდევნო სესიებზე.

ეს ჩვენთვის ძალიან მნიშვნელოვანი ფაქტია, პირველ რიგში იმიტომ, რომ საქართველოს საკითხი ძალიან აქტიურად დგას გაერო-ს დღის წესრიგში და ის დადგება მომდევნო სესიების განმავლობაშიც. ამ რეზოლუციას აღმოაჩნდა ძალიან დიდი მხარდაჭერა, კერძოდ, 43 წევრის მიერ იქნა სპონსორირებული. ეს ნიშნავს იმას, რომ ძალიან ბევრმა ქვეყანამ ჩვენ აღმოგვიჩინა მხარდაჭერა და იზრდება იმ ქვეყნების სია და რიცხვი, რომელიც უერთდება ამ რეზოლუციის სპონსორობას.

ამავე რეზოლუციაში არის ხაზგასმული საქართველოს ტერიტორიაზე, საქართველოს ხელისუფლების მიერ უზრუნველყოფილი კანონის უზენაესობა, ადამიანის უფლებების დაცვის ხარისხი და ზოგადად საქართველოში დემოკრატიის ხარისხი. ეს ყველაფერი ჩვენ გვაძლევს პირველ რიგში იმის შესაძლებლობას, რომ კიდევ ერთხელ მოვახდინოთ ძალიან დიდი კონსოლიდაცია, ორგანიზება და უზრუნველყოთ მხარდაჭერა სხვადასხვა ქვეყნების მხრიდან, ჩვენი ქვეყნის ტერიტორიული მთლიანობის და ჩვენი ქვეყნის დემოკრატიული განვითარების”, - განაცხადა თამარ ჩუგოშვილმა.

პარლამენტის ვიცე-სპიკერმა მიულოცა დიპლომატებს ეს გამარჯვება და აღნიშნა, რომ ამ გამარჯვების უზრუნველყოფაში მათ ძალიან დიდი ძალისხმევა ჩადეს.

შეგახსენებთ, რომ 2017 წლის 24 მარტს, ქ. ჟენევაში გაერო-ს ადამიანის უფლებათა საბჭომ 34-ე სესიის ფარგლებში მიიღო რეზოლუცია “თანამშრომლობა საქართველოსთან”. საქართველოს მიერ ინიცირებული რეზოლუციის თანასპონსორი გახდა 43 სახელმწიფო. აღსანიშნავია, რომ ეს არის პირველი რეზოლუცია, რომელიც ადამიანის უფლებებზე პასუხისმგებელმა გაერო-ს სპეციალურმა ორგანომ - ადამიანის უფლებათა საბჭომ მიიღო საქართველოს საკითხზე.

ნინო ექვთიმიშვილი