პოლიტიკა

საქართველოს რეგიონში ყველაზე წარმატებული დემოკრატია აქვს, ამიტომ, აქტიურად უნდა დავაყენოთ უსაფრთხოების საკითხები - ბათუ ქუთელია

ატლანტიკური საბჭოს ვიცე-პრეზიდენტის ბათუ ქუთელიას განცხადებით, რუსულმა რევანშიზმა მსოფლიო უსაფრთხოების დღის წესრიგს ახალი გარემოებები შეუქმნა.

ამის შესახებ ქუთელიამ „სამხრეთ კავკასიის უსაფრთხოების“ მეოთხე ფორუმის ფარგლებში მედიას განუცხადა.

მისი თქმით, ძველი პოსტ ცივი ომისეული წესრიგი შერყეულია, ახალ კონტურებზე მუშაობა კი, ეხლა მიმდინარეობს.

„რუსულმა აგრესიულმა რევანშისზმა შექმნა ახალი გარემოებები მსოფლიო უსაფრთხოების დღის წესრიგის კუთხით. კერძოდ, ძველი, ლიბერალური პოსტ ცივი ომისეული წესრიგი მნიშვნელოვნად შერყეული არის, ხოლო ახალი მსოფლიო წესრიგის კონტურებზე ეხლა მიმდინარეობს მუშაობა“,-აღნიშნა ექსპერტმა.
მისი თქმით, შექმნილ ვითარებაში სამხრეთ კავკასიის რეგიონი ორი რეგიონის- ევროპისა და ახლო აღმოსავლეთის კვეთაზე აღმოჩნდა.

მისივე თქმით, საქართველოს, რეგიონში განსაკუთრებული როლი აქვს, რადგან მას წარმატებული დემოკრატია გააჩნია.

„ამ სიტუაციაში, სამხრეთ კავკასია მოხვდა კვეთაზე ორი უმნიშვნელოვანესი რეგიონის - ევროპის და ახლო აღმოსავლეთის. შესაბამისად, ჩვენი რეგიონის როლიც და ფუნქციაც არის გაცილებით უფრო დიდი, ვიდრე თუნდაც ეს რამდენიმე წლის წინ იყო. ჩვენს რეგიონში, საქართველოს განსაკუთრებული როლი აქვს, იმდენად რამდენადაც, საქართველო არის ყველაზე წარმატებული დემოკრატია და აქედან გამომდინარე, გვაძლევს საშუალებას უფრო აქტიურად დავაყენოთ ჩვენი უსაფრთხოების საკითხები“,-აღნიშნა ბათუ ქუთელიამ

მონიკა დავლიანიძე