პოლიტიკა

საქართველოს პრეზიდენტმა ყურადღება მაინც და მაინც არასერიოზული და ზედაპირული განცხადებებით უნდა მიიქციოს - გია ვოლკსი კარასინის განცხადებაზე

საქართველოს პარლამენტის ვიცე-სპიკერი, გია ვოლსკი გამოეხმაურა რუსეთის საგარეო საქმეთა მინისტრის მოადგილის, გრიგორი კარასინის განცხადებას, რომლის თანახმად, რუსმა დიპლომატმა საქართველოსა და რუსეთის პრეზიდენტებს შორის შეხვედრა არ გამორიცხა.

ვოლსკის თქმით, კარასინის ნათქვამი გიორგი მარგველაშვილის „არასერიოზულ“ განცხადებებს მოჰყვა.

„ვითომ, მარგველაშვილმა არ იცის, რომ ამას მომზადება სჭირდება, ყურადღება მაინც და მაინც არასერიოზული და ზედაპირული განცხადებებით უნდა მიიქციოს. ამ განცხადების გაკეთება საჭირო არ იყო. კარასინის პასუხმაც დაგვარწმუნა იმაში, რომ მარგველაშვილი არასერიოზულ განცხადებებს აკეთებს. მომზადება იმას ნიშნავს, რომ ვითარება უნდა შეიქმნას, წინასწარი მოლაპარაკებები უნდა იყოს. ამასთან დაკავშირებით არც ვითარებაა, არც მოლაპარაკებებია. ტერიტორიები ოკუპირებულია, უამრავ საკითხზე პოლარიზებულად განსხვავებული პოზიციები გვაქვს. პრეზიდენტმა წინაპირობების შექმნაზე უნდა ილაპარაკოს, თუ მას პრეტენზია აქვს სერიოზულობაზე“, - განაცხადა დეპუტატმა.

ცნობისთვის, კარასინმა აღნიშნა, რომ „თეორიულად შესაძლებელია შეხვედრა ყველა დონეზე, მათ შორის უმაღლეს დონეზე, მაგრამ ამისთვის კარგი მომზადება სჭირდება“.

2 დღის წინ საქართველოს პრეზიდენტმა განაცხადა, რომ „ნატრობს იმ დროს, როდესაც რუსეთის ლიდერს დაელაპარაკება არა მისი იმიჯიდან, არამედ იმ ინტერესიდან გამომდინარე, რომელიც აქვს რომელიმე რუსულ ოჯახს მოსკოვში იქნება თუ პეტერბურგში“.

ანა მებურიშვილი