პოლიტიკა

საქართველოს პრეზიდენტი სერიოზულ პოლიტიკურ ამინდს უნდა ქმნიდეს და ასეთად სწორედ ბიძინა ივანიშვილი მიმაჩნია - დიმიტრი ხუნდაძე

საპარლამენტო უმრავლესობის წევრის, დიმიტრი ხუნდაძის განცხადებით, ბიძინა ივანიშვილი იქნება საუკეთესო საპრეზიდენტო კანდიდატი. ხუნდაძის შეფასებით, პრეზიდენტის პოსტზე ივანიშვილი „ყველაფერს დაალაგებს და ბევრ რამეს შეცვლის“.

„დღეს ბევრს საუბრობენ საპრეზიდენტო კანდიდატებზე მმართველი პარტიიდან. ყველა, ვინც შეიძლება მოიაზრებოდეს და ვისზედაც კი საუბარი ყოფილა მედიის მხრიდან, ღირსეული პირია, თუმცა, ვფიქრობ, ამ პერიოდში საქართველოს პრეზიდენტი სერიოზულ პოლიტიკურ ამინდს უნდა ქმნიდეს და ასეთად სწორედ ბიძინა ივანიშვილი მიმაჩნია.

როდესაც ბატონი ბიძინა პოლიტიკაში დაბრუნდა, მე განვაცხადე, რომ რეალური ცვლილებები იქნებოდა, ასეც მოხდა. ახლაც მჯერა, რომ თუ ბიძინა ივანიშვილი გადაწყვეტს არჩევნებში მონაწილეობას, მისი პრეზიდენტობა ყველაფერს დაალაგებს და ბევრ რამეს შეცვლის. ეს დღეს სჭირდება ქვეყანას და არა მმართველ პარტიას, მითუმეტეს, არც თავად ბიძინა ივანიშვილს.

„ქართულ ოცნებას“ საპრეზიდენტო არჩევნებში გამარჯვება ნებისმიერი კანდიდატით ისედაც გარანტირებული აქვს“, - განაცხადა ხუნდაძემ.