პოლიტიკა

საქართველოს პრეზიდენტი და პრეზიდენტის წარმომადგენლები თავს შეიკავებენ საკონსტიტუციო კომისიაში მონაწილეობის მიღებისაგან

პრეზიდენტის ადმინისტრაციის უფროსი, გიორგი აბაშიშვილი საკონსტიტუციო კომისიის ფორმირების პროცესს გამოეხმაურა.

როგორც აბაშიშვილმა დღევანდელ ბრიფინგზე განაცხადა, საქართველოს პრეზიდენტი და პრეზიდენტის წარმომადგენლები თავს შეიკავებენ საკონსტიტუციო კომისიაში მონაწილეობის მიღებისაგან.

,,საკონსტიტუციო კომისიის ფორმირების დროს ჩვენ განსაკუთრებით მნიშვნელოვნად მიგვაჩნია და მიგვაჩნდა, მაღალი ლეგიტიმაციის, ფართო ჩართულობის მაქსიმალური პოლიტიკური ნდობისა და კონსენსუსის უზრუნველყოფა.

საქართველოს პარლამენტის მხრიდან შემოთავაზებული წინადადება საკონსტიტუციო კომისიის შექმნის წესის შესახებ ვფიქრობ, არაერთ კითხვის ნიშანს აჩენს. წარმოდგენილი დადგენილების პროექტი ცალსახად მოკლებულია პოლიტიკურ ნდობას და პოლიტიკურ ლეგიტიმაციას, საკითხთა განხილვის დემოკრატიულობას და არ არის ორიენტირებული ფართო კონსენსუსის მიღწევაზე. უფრო მეტიც, აქ მეტი აქცენტია ერთპიროვნულ და ერთპარტიული გადაწყვეტილებების მიღებაზე.

შესაბამისად, საქართველოს პრეზიდენტი და პრეზიდენტის წარმომადგენლები თავს შეიკავებენ საკონსტიტუციო კომისიაში მონაწილეობის მიღებისაგან, თუმცა ამავდროულად, მინდა ხაზგასმით აღვნიშნო, რომ ჩვენ აქტიურად ავამუშავებთ ამ თვალსაზრისით არსებულ ერთადერთ საკონსტიტუციო ნორმას - კონსტიტუციური ცვლილებების საყოველთაო სახალხო განხილვას’’, - განაცხადა გიორგი აბაშიშვილმა.

შეგახსენებთ რომ „ქართულმა ოცნებამ“ უარყო პრეზიდენტის ინიციატივა, რომლითაც საკონსტიტუციო კომისიაში თანათავმჯდომარეები უნდა ყოფილიყვნენ პრეზიდენტი, პრემიერი და პარლამენტის თავმჯდომარე. როგორც ცნობილია, კომისიას თავად პარლამენტის თავმჯდომარე, ირაკლი კობახიძე უხელმძღვანელებს.

ნინო ექვთიმიშვილი