პოლიტიკა

„საქართველოს პატრიოტები“ საგარეო ურთიერთობათა კომიტეტის სხდომის დახურვას მოითხოვენ

პარლამენტის ფრაქცია „საქართველოს პატრიოტები“ საგარეო ურთიერთობათა კომიტეტის სხდომის დახურვას ითხოვენ.

როგორც ფრაქციის წევრმა ადა მარშანიამ ჟურნალისტებთან საუბრისას აღნიშნა, კომიტეტზე დღეს „ქართული ოცნების“ რეზოლუციის პროექტი უნდა განიხილონ, რომელიც ქვეყნის საგარეო პრიორიტეტების განსაზღვრას უკავშირდება.

,,რეზოლუცია არ უნდა ერქვას ამ დოკუმენტს. ამის შესახებ მე კომიტეტის სხდომაზე ვიტყვი აუცილებლად. სათაური წავიკითხე მექანიკურად. მთავარია იქ ეწერა, რომ საგარეო პოლიტიკას ეხება ეს დოკუმენტი. ძალიან მნიშვნელოვანი დოკუმენტია. იმედი მაქვს, რომ საფუძვლიანად ვისაუბრებთ ამაზე. ბევრი საინტერესო ფორმულირებებია. ბევრს ვეთანხმებით,მაგრამ რაღაც დებულებებს არ ვეთანხმებით. მე საჯაროდ ვერ გეტყვით რას არ ვეთახმები. დოკუმენტში არის სერიოზული წინააღმდეგობა ძირითად საკითხებში. ჩვენი ძალის პოლიტიკურ შენიშვნებს კომიტეტზე აუცილებლად დავაფიქსირებ და მოვითხოვ იმასაც, რომ ეს კომიტეტი დახურულ ფორმატში წარიმართოს“, - განაცხადა ადა მარშანიამ.

ცნობისათვის: პარტია „ქართულმა ოცნებამ” ქვეყნის საგარეო პოლიტიკის შესახებ ახალი რეზოლუცია მოამზადა. დოკუმენტის თანახმად, საქართველოს საგარეო პოლიტიკის მთავარ ამოცანად ქვეყნის სუვერენიტეტის განმტკიცება, დეოკუპაცია და მშვიდობიანი გზით ტერიტორიული მთლიანობის აღდგენა სახელდება.

ნინო ექვთიმიშვილი