პოლიტიკა

,,საქართველოს პატრიოტები’’ პარლამენტის რეგლამენტის გადახედვას და მასში შესწორებების შეტანას მოითხოვენ

პარლამენტის ფრაქცია „საქართველოს პატრიოტების“ წევრის, ადა მარშანიას განცხადებით, პარლამენტის რეგლამენტი უნდა გადაიხედოს და მასში შესწორებები შევიდეს.

როგორც მარშანიამ პარლამენტში გამართულ ბრიფინგზე აღნიშნა, პრობლემებია ასევე კვოტების გადანაწილებასთან დაკავშირებით, რადგან ნაციონალური მოძრაობა ორად გაიყო.

,,საერთაშორისო ორგანიზაციებში კვოტებთან დაკავშირებით, დღემდე ჭიდილი და ომი გვაქვს. შევიტყვეთ, რომ ამ თვალსაზრისით მდგომარეობა გართულდა, რადგან „ნაციონალური მოძრაობა“ ორად გაიყო, ახალი ფრაქციები გაჩნდა, რისი უფლებაც მათ აქვთ, მაგრამ ეს მათ საფუძველს არ აძლევს, რომ დამატებითი კვოტები მოითხოვონ - საერთაშორისო ორგანიზაციებში, ნდობის ჯგუფში თუ სპიკერატში. ამ ყველაფრის უფლება ბარიერგადალახულ პარტიებს აქვთ“, - განაცხადა მარშანიამ.

მისივე თქმით, პარლამენტის თავმჯდომარე ისეთივე დეპუტატია, როგორც ნებისმიერი წევრი.

,,ჩვენ პარლამენტის კედლებში ნებისმერი განცხადების გაკეთებისთვის თავისუფალი უნდა ვიყოთ, ყოველგვარი ნებართვის გარეშე. თურმე, პარლამენტის წევრს პარლამენტის თავმჯდომარის მხრიდან ნებართვა სჭირდება რომ ციხეში შევიდეს და პატიმარი მოინახულოს. ეს ახალი ამბავია და დეპუტატს ზღუდავს. პარლამენტში რომ ვმუშაობდი, სხვანაირად იყო და სამართლიანად. სხვათა შორის, ეს ჩანაწერი კონსტიტუციას ეწინააღმდეგება. ნებართვას ან მიიღებ, ან - არა. ანუ, ეს ავტომატური არ არის. დიდი პატივისცემის მიუხედავად, პარლამენტის თავმჯდომარე ისეთივე დეპუტატია, როგორც - ჩვენ. ის, რომ პარლამენტის თავმჯდომარედ დანიშნულია, იმას არ ნიშნავს, რომ ჩვენი უფროსია. ის სხდომებს უძღვება და ცდილობს, რომ პარლამენტში სხდომა მაქსიმალურად გაიმართოს. ის აპარატის უფროსია და მისი ფუნქცია იმაში გამოიხატება, რომ პარლამენტის ნორმალური ფუნქციონირებისთვის ყველაფერი გააკეთოს”, - განაცხადა ადა მარშანიამ.

დეპუტატი მიზანშეწონილად მიიჩნევს, პარლამენტში შეიქმნას სპეციალური ჯგუფი რათა მოხდეს რეგლამენტის გადახედვა.

,,ბევრი მუხლია ისეთი, რომელიც თავად კონსტიტუციას ეწინააღმდეგება. ბევრი ისეთი პასაჟია, რომელიც კიდევ ერთხელ გვიჩვენებს იმას, ქვეყანა თუ რა რეჟიმში მუშაობდა. ეს რეგლამენტი შესწორებული და მიღებულია სააკაშვილის უზურპაციის დროს. პარლამენტი რაღაც-რაღაცებს ასწორებს, მაგრამ ის იმ ტემპში არ ხდება, რა მოცულობაშიც პარლამენტმა უნდა გადახედოს, ძალიან მანკიერი და ხშირად უზურპირებულ ნორმებს, რომელის სააკაშვილის დროს იყო მიღებული. პარლამენტის რეგლამენტზე მუშაობა აუცილებელია. ბაქრაძის მიერ ხელმოწერილი რეგლამენტი, როგორი იქნება? ამ რეგლამენტის მანკიერება საკუთარ თავზე განვიცადეთ და ჩვენი სათქმელი ვერ ვთქვით. სიტყვით გამომსვლელებში გუშინ ბოლოს ჩამწერეს, მაგრამ გააფრთხილეს, რომ ვერ მოვასწრებთო.

უმრავლესობას არ მოვეშვებით, სანამ ბოლომდე არ გავიტანთ,”-განაცხადა ადა მარშანიამ.

ნინო ექვთიმიშვილი