პოლიტიკა

საქართველოს მტკიცედ აქვს გადაწყვეტილი ნატოს წევრობის დღის წესრიგის განხორციელება - გიორგი კვირიკაშვილი

საქართველოს პრემიერ-მინისტრის, გიორგი კვირიკაშვილის განცხადებით, საქართველოს მტკიცედ აქვს გადაწყვეტილი ნატოს წევრობა. ამის შესახებ მან ნატოს საპარლამენტო ასამბლეის საგაზაფხულო სესიაზე თქვა.

„ნატო წარმოადგენს ყველაზე წარმატებულ ალიანსს, რადგან ის ერთ მუშტად შეკრული დგას თავისი წევრების თავისუფლების, სუვერენიტეტისა და დემოკრატიის სადარაჯოზე და მზად არის, თავის რიგებში მიიღოს ევროპული ქვეყნები, რომლებიც იზიარებენ იმავე ღირებულებებს, მზად არიან და შესწევთ უნარი, წვლილი შეიტანონ ევროატლანტიკური უსაფრთხოების გაძლიერებაში. ალიანსის „ღია კარის“ პოლიტიკის კიდევ ერთი ნათელი დადასტურებაა გადაწყვეტილება ნატოს 29-ე წევრად მონტენეგროს მიწვევის შესახებ. საქართველოს მტკიცედ აქვს გადაწყვეტილი ნატოს წევრობის დღის წესრიგის განხორციელება, რაც არის ჩვენი მოქალაქეების უმრავლესობის ნება და რასაც მხარს უჭერენ ქვეყნის ძირითადი პოლიტიკური პარტიები“,- განახადა კვირიკაშვილმა.

როგორც კვირიკაშვილმა აღნიშნა, ალიანსთან მუდმივი დიალოგის წყალობით საქართველოსა და ნატოს შორის პრაქტიკული თანამშრომლობის დონემ დიდ მასშტაბებს მიაღწია. კერძოდ, პრემიერ-მინისტრმა ყურადღება გაამახვილა წვრთნისა და შეფასების ერთობლივ ცენტრზე, თავდაცვის ინსტიტუციური აღმშენებლობის სკოლაზე, 15 სხვადასხვა პროექტსა და საქართველოსი მომუშავე ნატოს 30-ზე მეტ ექსპერტს. პრემიერ-მინისტრის თქმით, საქართველოს პროგრესი ნატოს ვარსავის სამიტზე დაამტკიცეს.

გარდა ამისა, კვირიკაშვილმა ისაუბრა საქართველოს მონაწილეობაზე ნატოს სხვადასხვა მისიაში.

„საქართველომ უკვე დიდი ხანია დაადასტურა, რომ მნიშვნელოვანი წვლილი შეაქვს ევროატლანტიკური უსაფრთხოების უზრუნველყოფაში. როგორც ასპირანტი სახელმწიფო და პარტნიორი, საქართველო არის ავღანეთის ნატოს მისიის ყველაზე დიდი მხარდამჭერი ალიანსის არაწევრ სახელმწიფოებს შორის. ჩვენ ასევე ვმონაწილეობთ ცენტრალური აფრიკის რესპუბლიკასა და მალიში ევროკავშირის კრიზისების მართვის ოპერაციებში. გარდა ამისა, ჩვენი ასეული მონაწილეობს ნატოს სწრაფი რეაგირების ძალებში", - აღნიშნა კვირიკაშვილმა.

შეგახსენებთ, 26 მაისიდან თბილისში ნატოს საპარლამენტო ასამბლეის საგაზაფხულო სესია იმართება, რომელიც დღეს დასრულდება.

ანა მებურიშვილი