პოლიტიკა

საქართველოს მოქალაქეებმა ევროკავშირთან უვიზო რეჟიმით 250 ათასჯერ ისარგებლეს - ვახტანგ მახარობლიშვილი

საქართველოს საგარეო საქმეთა მინისტრის მოადგილის, ვახტანგ მახარობლიშვილის განცხადებით, საქართველოს მოქალაქეებმა ევროკავშირთან უვიზო რეჟიმით 250 ათასჯერ ისარგებლეს.

როგორც ვახტანგ მახარობლიშვილმა ევროპასთან ინტეგრაციისა და საგარეო ურთიერთობათა კომიტეტის გაერთიანებულ სხდომაზე განაცხადა, ხვალ ერთი წლის სრულდება მას შემდეგ, რაც საქართველოს მოქალაქეებისთვის შენგენის ზონის ქვეყნებში უვიზოდ მიმოსვლის შესაძლებლობა ძალაში შევიდა.

„ერთი წლის წინ, 2017 წლის 28 მარტს საქართველომ მიიღო მნიშვნელოვანი მონაპოვარი, რომელსაც უნდა გავუფრთხილდეთ და ძალისხმევა გავწიოთ, რათა არ მოხდეს უვიზო რეჟიმის ბოროტად გამოყენება. გავიზიარებ იმ მოსაზრებას, რომ უვიზო რეჟიმს ჰქონდა ძალიან მნიშვნელოვანი პოლიტიკური დატვირთვა. ეს იყო დიდი წინგადადგმული ნაბიჯი ევროპული ინტეგრაციის გზაზე, ისევე როგორც მნიშვნელოვანი გზავნილი ევროკავშირის მხრიდან. დღეის მდგომარეობით შეიძლება ითქვას, რომ 250 ათასზე მეტჯერ გამოიყენეს ეს სიკეთე საქართველოს მოქალაქეებმა”, – განაცხადა ვახტანგ მახარობლიშვილმა.

მისი თქმით, მას შემდეგ, რაც უვიზო რეჟიმი ამოქმედდა, საქართველოს ხელისუფლებამ გააგრძელა ვალდებულებების შესრულება, რაც აღებული ჰქონდა ვიზალიბერალიზაციის სამოქმედო გეგმის მიხედვით.

როგორც მინისტრის მოადგილემ აღნიშნა, შეჩერების მექანიზმის ამოქმედების საფრთხე საქართველოს წინაშე არ დგას.

„ჩვენი სურვილია, რომ ჩვენმა მოქალაქეებმა ეს დიდი სიკეთე წარმატებულად გამოიყენონ. მიმდინარე პერიოდში, ყველა ჩვენგანმა ვიცით, რომ თავი იჩინა გარკვეულმა გამოწვევებმაც, სირთულეებმაც, რომელიც კონკრეტული კუთხით იქნა განსაკუთრებულად გამოვლენილი და ეს არის თავშესაფრის პრინციპის ბოროტად გამოყენება, ისევე როგორც კრიმინალის დანაშაულის ზრდა მთელ რიგ სახელმწიფოებში. მინდა, ცალსახად განვაცხადო, რომ მიუხედავად იმისა, რომ ზოგიერთ ჩვენი პარტნიორი სახელმწიფოს მხრიდან გამოითქვა წუხილი, შეჩერების მექანიზმის ამოქმედების საფრთხე, დღეს საქართველოს წინაშე არ დგას. ეს საკითხი არ განხილულა არც ევროკავშირის ინსტიტუტებში, არც ევროკომისიის შიგნით და არც წევრი სახელმწიფოს მხრიდან, თუმცა მნიშვნელოვანი იყო და რჩება მყისიერად ვუპასუხოთ იმ გამოწვევებს, რომელმაც თავი იჩინა”, – განაცხადა ვახტანგ მახარობლიშვილმა.