პოლიტიკა

საქართველოს მოქალაქეების მიერ სხვა ქვეყანაში თავშესაფრის მიღება გართულდება - საგარეო საქმეთა მინისტრის მოადგილე

საგარეო საქმეთა მინისტრის მოადგილის, ვახტანგ მახარობლიშვილის განცხადებით, მიუხედავად იმისა, რომ მოქალაქე მოითხოვს თავშესაფარს, მას მაინც გამოაბრუნებენ საქართველოში, რადგან საქართველო მიიჩნევა უსაფრთხო ქვეყნად.

როგორც საგარეო უწყების წარმომადგენელმა ჟურნალისტებს განუცხადა, ვიზის ლიბერალიზაციის შეჩერების მექანიზმის ამოქმედების თავიდან აცილების მიზნით, საქართველოს მოქალაქეების მიერ თავშესაფრის მიღება სხვა ქვეყანაში გართულდება.

მინისტრის მოადგილემ ვიზის ლიბერალიზაციაზე საუბრისას აღნიშნა, რომ ამუშავდება გარკვეული შეზღუდვები, რათა ქვეყანას ზიანი არ მიადგეს.

„ამიტომ არის ძალიან მნიშვნელოვანი, რომ ჩვენმა მოქალაქეებმა ეს კარგად გაითვალისწინონ, რომ მაინც მოხდება ჩვენი მოქალაქეების დაბრუნება იმიტომ, რომ როგორც უკვე აღვნიშნე, ითვლება უსაფრთხო ქვეყნად საქართველო. მაგრამ ეს იქნება დაკავშირებული მათ პირად დიდ ხარჯთან, ისევე, როგორც ზიანთან, როგორც მათი მიმართულებით, ასევე, ქვეყნის მიმართულებით,“ - განაცხადა ვახტანგ მახარობლიშვილმა.