პოლიტიკა

საქართველოს მიერ კანონის უზენაესობის მხრივ მიღწეული პროგრესი ჩანაცვლდა კლეპტოკრატიითა და კორუფციის დაუსჯელობით - “ძალა ერთობაშია”

გაერთიანებული ოპოზიცია "ძალა ერთობაშია” "საერთაშორისო გამჭირვალობის" ცენტრალური ოფისის იმ დასკვნას ეხმაურება, სადაც ხელისუფლების მიტაცებასაზეა საუბარი და საქართველოში არსებულ ვითარებას საგანგაშოდ მიიჩნევენ.

გაერთიანებულ ოპოზიციის განცხადებით, მსგავსი სახის დასკვნა მიუთითებს იმაზე, რომ საერთაშორისო ასპარეზზე ქვეყანას იმიჯი აქვს შელახული.

„2018 წლის 16 ოქტომბერს „საერთაშორისო გამჭვირვალობის“ სამდივნოს მიერ გავრცელდა განცხადება, რომლის თანახმადაც ის საგანგაშოდ მიიჩნევს საქართველოში არსებულ მდგომარეობას სახელმწიფოს მიტაცების (state capture) მზარდი ნიშნებისა და ხელისუფლების წამყვანი პირების მხრიდან სამოქალაქო სექტორზე სიტყვიერი თავდასხმების გამო.

ჩვენ სრულად ვიზიარებთ ამ ავტორიტეტული საერთაშორისო ანტიკორუფციული ორგანიზაციის შეშფოთებას აღნიშნული საკითხზე და კატეგორიულად მიუღებლად მიგვაჩნია „ქართული ოცნების“ აღმასრულებელი მდივნისა და საქართველოს პარლამენტის თავმჯდომარის განცხადება, სადაც ის მძიმე პოლიტიკური სკანდალებიდან სავარაუდოდ ყურადღების გადატანის მიზნით, სამოქალაქო ორგანიზაციების ხელმძღვანელებს ფაშიზმის თანამონაწილეები უწოდა.

მრავალი წლის განმავლობაში, საქართველო წამყვანი ქვეყანა იყო რეგიონში ანტიკორუფციული საქმიანობისა და ეფექტური მმართველობის ხელშეწყობის თვალსაზრისით, მაგრამ ბოლო წლების განმავლობაში ჩვენ თვალნათლივ ვხედავთ ყოველდღიურად მზარდ უკუსვლას სახელმწიფო ინსტიტუციებისა და დემოკრატიული მმართველობის კუთხით. უფრო და უფრო მეტი საქართველოს მოქალაქისათვის თვალსაჩინო ხდება, რომ საქართველოს მიერ კანონის უზენაესობის მხრივ მიღწეული პროგრესი ჩანაცვლდა კლეპტოკრატიითა და კორუფციის დაუსჯელობით. და ამ პროცესმა უკვე კრიტიკულ ზღვარს მიაღწია.

ქვეყანაში მოქმედი კრიმინალურ-მაფიოზური არაფორმალური მმართველობის პირობებში საქართველოს სამართავდამცავი ორგანოებმა ვერ/არ გამოიძიეს ვერც ერთი საქმე, რომელიც საზოგადოების განსაკუთრებულ ინტერესს წარმოადგენდა და რომელშიც ხელისუფლების პირდაპირი ინტერესი იკვეთებოდა. ჩვენ არც ახლა გვაქვს იმის იმედი, რომ სამართალდამცავები გამოიძიებენ ბოლო პერიოდში, მედიაში გავრცელებული აუდიო/ვიდეო ჩანაწერების სკანდალურ (ომეგა ჯგუფი, მირზა სუბელიანი) საქმეებს სადაც ნათლად ჩანს ხელისუფლების უმაღლესი პირების მაფიოზური ინტერესები და მათი ზეწოლა ბიზნესსა და თავისუფალ მედიაზე.

ჩვენ ღრმად გვწამს, რომ 28 ოქტომბერს ქართველი ამომრჩეველი გააკეთებს სწორ არჩევანს, რითიც საკადრის პასუხს გასცემს ხელისუფლებაში მოკალათებულ კრიმინალებს. ამავე დროს, ოპოზიციური პოლიტიკური სპექტრი, სამოქალაქო სექტორთან ერთად არ დავუშვებთ არჩევნების შედეგებით მანიპულირებასა და გაყალბებას“, - აღნიშნულია განცხადებაში.