პოლიტიკა

საქართველოს კონკურენციის სააგენტოს და სახელმწიფო ენის დეპარტამენტს შორის ურთიერთთანამშრომლობის მემორანდუმი გაფორმდა

საქართველოს კონკურენციის სააგენტოს თავმჯდომარე, ნოდარ ხადურმა და სახელმწიფო ენის დეპარტამენტის თავმჯდომარე, გიორგი ალიბეგაშვილმა საქართველოს დამოუკიდებლობის 100 წლის იუბილესადმი მიძღვნილი ღონისძიებების ფარგლებში ურთიერთთანამშრომლობის მემორანდუმს მოაწერეს ხელი.

„ქართულ ენაში კონკურენციის სფეროს მიკუთვნებული ტერმინების სწორად ასახვისა და დამკვიდრების მიზნით ჩვენ ერთად სხვადასხვა ტიპის ღონისძიებას განვახორციელებთ. სახელმწიფო ენის დაცვა თითოეული ჩვენგანის ვალია. დეპარტამენტის მიერ სააგენტოსათვის კონსულტაციების გაწევა, რეკომენდაციების შემუშავება, სახელმწიფო ენის ნორმების გამოყენებისა და დაცვის მიზნით უმნიშვნელოვანესია. სწორედ დღეს, საქართველოს დამოუკიდებლობის 100 წლის იუბილეს ფარგლებში, ურთიერთთანამშრომლობის მემორანდუმს მოვაწერეთ ხელი, რაც ხელშემწყობი პირობა იქნება - კონკურენციის კანონმდებლობაში სახელმწიფო ენის ნორმების დამკვიდრებისათვის, კონკურენციის პოლიტიკის წარმართვის პროცესში სააგენტოს მიერ გამოცემულ სამართლებრივ აქტებში სახელმწიფო ენის ნორმების გამოყენებისა და დაცვისათვის. იმედი მაქვს, რომ ერთობლივად ჩვენ ბევრ კარგ საქმეს გავაკეთებთ“, - განაცხადა შეხვედრისას ნოდარ ხადურმა.

„ქართული ენის დაცვისა და პოპულარიზაციისთვის მნიშვნელოვანია ჩვენი თანამშრომლობა სხვადასხვა ორგანიზაციებთან, იქნება ეს ბიზნესი თუ სახელმწიფო ინსტიტუტები. რეკომენდაციები ენის დასაცავად, მისი სრულყოფის ხელშეწყობა, საინფორმაციო და მეთოდური ღონისძიებების განხორციელება - სახელმწიფო ენის დეპარტამენტის საქმიანობის უმთავრესი ამოცანებია. ამ საქმეში ჩვენი მოკავშირეები არიან სტუდენტები, მედია, ბიზნესის სფერო და საჯარო დაწესებულებები, მათ შორის საქართველოს კონკურენციის სააგენტო“, - აღნიშნა გიორგი ალიბეგაშვილმა.

მხარეები შეთანხმდნენ, რომ კონკურენციის კანონმდებლობისა და პოლიტიკის წარმართვის პროცესში სააგენტო ხელს შეუწყობს სახელმწიფო ენის სალიტერატურო ნორმათა დაცვასა და პოპულარიზაციას, დეპარტამენტი კი მას კონსულტაციას გაუწევს. ისინი ითანამშრომლებენ საერთო სარეკომენდაციო ჩარჩოს შექმნაზე.