პოლიტიკა

საქართველოს ხელისუფლებამ წარმატებით განახორციელა ის, რომ ტელეკომპანია „იბერია“ არის დახურული - არხის 200-მდე თანამშრომელი გაურკვევლობაშია

„ხელისუფლებამ დახურა იბერია“, - მას შემდეგ, რაც ტელეკომპანია „იბერიამ“ დახურვის შესახებ განაცხადა, ეთერში საპროტეტსო წარწერა გადის.

არჩევნებამდე 12 დღით ადრე არხის დახურვის მიზეზად ხელმძღვანელობამ ფინანსური კრიზისი დაასახელა, რომელიც, მათი განმარტებით, მას შემდეგ დაიწყო, რაც ხელისუფლებამ „ომეგა ჯგუფს“ პრობლემები შეუქმნა.

„იბერიას“ დამფუძნებელმა, დეპუტატმა ნატო ჩხეიძემ შექმნილი კრიზისის გამო ბიზნესმენებს არხზე რეკლამის განთავსებისკენ მოუწოდა.

„თუკი უნდათ, რომ ამუშავდეს ტელეკომპანია „იბერია“, ამისთვის არსებობს ორი საშუალება. ერთია, „ომეგა ჯგუფი“ ამუშავდეს და მეორე საშუალებაა, ყველა, ვინც მუშაობს და ჯერ არ დახურულა ამ ხელისუფლების პირობებში, შემოიტანოს რეკლამა“, - განაცხადა არხის მფლობელმა ნატო ჩხეიძემ.

წლების განმავლობაში ტელეკომპანია „იბერიას“ მისი მფლობელი "ომეგა ჯგუფი" აფინანსებდა. მას შემდეგ კი რაც ხელისუფლებამ „ომეგას“ პრობლემები შეუქმნა და სიგარეტის ქარხანა OGT-ი დახურა, არხზე კრიზისი შეიქმნა.

„იბერიას“ 200-მა თანამშრომელმა ჯერ არ იცის, სად გააგრძელებს მუშაობას.

„კომპანიას არავითარი სახსრები აღარ აქვს, რომ გავაგრძელოთ მუშაობა. ამოწურულია ყველანაირი დაფინანსება და პრაქტიკულად დღეიდან ვართ ჩვენ, ტელეკომპანია „იბერიაში“ მომუშავე ადამიანები, უმუშევრები. საქართველოს ხელისუფლებამ წარმატებით განახორციელა ის, რომ ტელეკომპანია „იბერია“ არის დახურული , - განაცხადა „იბერიას“ საინფორმაციო სამსახურის ხელმძღვანელმა ვახო ხუზმიაშვილმა.