პოლიტიკა

საქართველოს ხელისუფლება ყველაფერს გააკეთებს, რათა ყველა ის პირი გამოვლინდეს , რომლებსაც არჩილ ტატუნაშვილის გარდაცვალებაში ბრალი მიუძღვით- არჩილ თალაკვაძე

საპარლამენტო უმრავლესობის ლიდერი, არჩილ თალაკვაძე აცხადებს, რომ საქართველოს ხელისუფლება ყველაფერს გააკეთებს, რათა ყველა ის პირი გამოვლინდეს და პასუხისგებაში მიეცეს, რომელსაც არჩილ ტატუნაშვილის გარდაცვალებაში ბრალი მიუძღვით.

„კიდევ ერთხელ ვუსამძიმრებ ოჯახს ამ დიდ დანაკარგს. საერთაშორისო პარტნიორების ჩართულობით, 28 დღის დაგვიანებით მოხერხდა ცხედარი გადმოსვენებულიყო. ექსპერტიზა ჩატარდა და ჩვენ ამ ფაქტს აუცილებლად საფუძვლიანად გამოვიძიებთ. ყველაფერს გავაკეთებთ იმისათვის, რომ დამნაშავეები გამოვლინდნენ და პასუხისგებაში მიეცნენ. ეს ძალიან მძიმე ფაქტია, თუმცა საქართველო მშვიდობიანი გზით, საერთაშორისო სამართლის ფარგლებში ბრძოლას გააგრძელებს იმისთვის, რომ ჩვენი ტერიტორიული მთლიანობა აღდგეს და მავთულხლართებით ხელოვნურად გაყოფილი საზოგადოება გაერთიანდეს“, - განაცხადა თალაკვაძემ.

თალაკვაძე ამბობს, რომ საერთაშორისო აქტორების მონაწილეობით ფაქტის საფუძვლიან გამოძიებას ითხოვენ. ასევე ხელისუფლება ოკუპირებულ ტერიტორიებზე საერთაშორისო მექანიზმების დაშვებასა და ცეცხლის შეწყვეტის შესახებ ხელშეკრულებით გათვალისწინებული მოთხოვნების შესრულებას ითხოვს, რომელიც თალაკვაძის თქმით, რუსეთს დღემდე შეუსრულებელი აქვს.

„ადამიანებს, რომლებიც, შესაძლოა, ბრალდებული, ან მსჯავრდებული იყვნენ ჩვენი მოქალაქეების წინააღმდეგ ჩადენილ დანაშაულებში, რა თქმა უნდა, დიდი მნიშვნელობა აქვს, რომ საგამოძიებო ორგანოებმა ყველაფერი გააკეთონ იმისათვის, რომ მტკიცებულებები იყოს მაქსიმალურად მოპოვებული, მოწმეები დაკითხულნი და ყველა იმ დარღვევის დოკუმენტირება მოხდეს, რასაც ოკუპირებულ ტერიტორიებზე აქვს ადგილი.“- განაცხადა თალაკვაძემ.

ცირა გურგენიძე